ABIDE
WITH ME - H.F. LYTE
Vatâwk
hi a thih dawnin mawi êm êmin a hrâm țhîn a ni, an ti. Sâp ho țawngkam ah pawh
'Swan's song' an ti a, chu chu thuchah hnuhnung- ngaihnawm bawk si sawina ang
hi a ni mai a. Henry Francis Lyte pawh khan natna khirh tak mai a nei a,
chuvangin a taksa pawh a chau viau țhîn a. Ni khat chu kum 1847 khan a țhian
țha tak W.H.Monk nên tlai ni tla tûr sen no phût mai, zân lo thleng tûrin a
thimhnan mêk lai chu thinlung taka lungleng êm êm chungin an thlir dûn a. Rei
tak pawh dam a in beisei tawh lo a ni thei a, chu bâkah a hrisêlna a lo țhat
zâwk beiseiin doctorin France rama han awm hrih tûra a tih vanga a tûk maia kal
a lo tum bawk avang pawhin a lung pawh a chhe tel bawk a ni ber ang. Pencil leh
lehkha a lachhuak a,
"Ka Lalpa duhtak, min awmpui ang che,
Khua
a thim dawn, min kalsan suh ang che.." tih chu a han thâi a, tichuan a
ziak zêl a, he hla mawi leh lung kuai tak mai; min ti lungchhe thei si, min
thlamuan thei bawk si hi a rawn phuah chhuak ta a ni. A țhian W.H.Monk hian a
thlûk chu a siam a ni, an ti. Lyte chu a tûkah chuan France rama va awm deuh
tûr chuan a kal ta nge nge a. Nice an tih khawpui va thlen ațanga rei vak lovah
chuan a chau zual a, a thi zui ta a ni.
He
hla hi England Lal, King George V pawh khan a ngaina hlè a. A nupui neihna ah
an sa a, a fanu pasal neihna ah pawh a sak tir leh a (a fanu tih hi tun hnua
Queen Elizabeth- II hi a ni). India ramah pawh Christian ni ve lo mahse,
Mahatma Gandhi-a hla ngainat berte zing ami a ni a. Hmanah chuan Delhi
kawtthlêrah Army Band hovn tlai ni tlâk dawnin (retreat hunah) tlai tin hian an
tum (play) țhîn a. Tunah pawh, inhmeh an ti ve ngei ani ang, Martarte
hriatrengna hmunah te Regiment engemaw zat Band party te chuan an la hmang a
ni. An ngai urhsûn hlê tih kan hriat
theihna chu, Regiment ho hian, "Chawhma lamah kan sa ngai lo," an ti
a, damlai ni mual liam mêk awihna atan an serh hrang ni âwm tak a ni!
"Hold thou thy Cross before my closing
eyes,
Shine through the gloom and point me to the
skies..."
{"Ka maimitchhînin ka hmaah awm la,
Khawthimah Vân ngaihtuah min pui ang
che..."}
-
Kan damlai ni tla mêk awih liâmna hla, Swan's song țha tak a ni e!
