Missionary Day pual - MISSIONARY RILRU

MISSIONARY RILRU

Vawin Missionary Day alo thlen hian, kan Lal Isua thupêk hnuhnung ber leh a ngaih pawimawh êm êm, "Khawvêl zawng zawnga kal a, thilsiam zawng zawng hnêna Chanchințha hril" tûra min chah lawm lawmna hi i ngaihtuah lawk teh ang u.

   

Mother Teressa kha  (Missionaries of Charity a din tirh lam khan), mi tu emawin, "Hetiang fahrah berh lutuk ho hi engtin nge i hmangaih theih?" tiin a zâwt niâwm ani. Chuta Mother Teressa chhânna chuan tûn thlengin mite riru ala hneh êm êm ani - "An hmêlah Isua hmêl ka hmu!" ati! He rilru hi missionary rilru chu ani: Riangvaite hmelah Isua hmel hmuh theiha hi.

  

Piangthar diktak chuan Chanchințha puândarh hi a thupui ber ani tûr ani a; chuti lo chu a piantharna kha ennawn a țûl hiâl ang. Kohhran pawhin Mission hna lampang a ngaihthah anih chuan, Kohhran thi (dead Church) ani ang. Lal Isua thupêk hnuhnûng ber, 'His last Commission' chu, "Khawvêl zawng zawngah kal ula, thil siâm zawng zawng hnênah chuan, Chanchințha hi hril rawh u" (Marka 16:15) tih hi ani. Isaia phei chuan, "I rawng bawl duh lo hnam leh ram chu a boral dawn si a; ani, chung hnamte chu tihchhiat hlauhin an awm ang. (Isaia 60:12) ati hiâl ani.

  

Sual thupha châwinan Lal Isua chu mi zawng zawng thih ai a thi a, khawvêl sual thiltihtheihna hnehin a tho leh a; chu chuan Pathian lung ati awi ta a. Amah chu a ring apiang an boral lohva chatuana nunna an neih theihna kawng a buâtsaih ta a (Johana 3:16 thu). He thu hi chanchințha laimu, kan puan mawlh mawlh tûr chu ani.

 

Hla siamtu Laibata chuan,

"I thawh loh avângin, tamtak an boral e, Lalpa hmangaihte an ral mêk" tiin chona a siam a, kan khawvêl hun hmanhmawh tawh takah hian, Lal Isua chhandamna Chanchințha la hre rêng rêng lo an la tam êm êm a. Bible emaw pamphlet emawte pawh han sem chiâm mah ila, hrilhfiah sak tu an mamawh; Ethiopia mi tilreh hnênah zirtîr Philipan a thil chhîarlai a hrilfiah sak hma loh chu a hrethiâm chuang lo ang khan, țawngka ngeia kan sawi mawlh mawlh hi a țûl ani. Chuvângin, Christian tawh phawt chu Missionary rilru pu tûrin i infuih sauh sauh ang u. Vawiinah hian kan hnênah,

 "Ka chhandamna Zion tlangah chuan rawn hruai la,

  An tan hmun nuam leh hahchawlhna ka buâtsaih e.." Lalpan ati ani.

Article - LALPAAH CHÂWL LA

LALPAAH CHÂWL LA

   “Lalpaah chuan châwl la, amah chu

   nghâk fan fan rawh." (Sam 37:7 a)

  

   Lalpa-a chawlh hi eng nge ni ang aw?

  

Engmah ngaihtuah lo leh țhuthluâng nunin kan awm tawp mai dawn tihna em ni ang le? Chutiang chu Lalpa-a châwl nun anih a rinawm hauh lo mai. Khawvêla kan awm chhungin mamawh kan nei a, duh kan nei, tihdam kan ngai a, kawng engkimah Lalpa hnenah tlu lûtin kan duhnate hriattir a, kan theihtâwk ti ve zêl chungin,  a rorelna erawh chu  "I thu ang zelin" ti chunga Pathian ruahmanna lo "Amen" zêl mai hi Lalpa-a chawl nun chu alo ni.

   Thil awlai tak erawh ava ni si lo țhîn êm! Bible pawin, " nghâk fan fan" tûrin min zirtîr rêng a. "Fan fan" tih țawngkam hian thil awlsam tak ani lo tih ati lang chiang ngawt mai. Dawhthei takin, phunnawi lovin, ring tlat chungin, beisei chungin...  tihte pawhin a sawi theih ang chu.

  

Lalpa kan nghah fan fan loh avanga kan nunin humsuâl a dâi leh, kan pal hnawkte pawh hi a tam viau țhîn ani! Abrahaman Lalpa a nghah fan fan loh avangin, Hagari lakah fapa Ismaela anei thawt thawt a. A thlahte chuan tûn thlengin khawvêl an la chawk buai zêl anih hi!

  

Keini chuan hmalam tawitê kan thlîr a, kan hmalam hun hi tawngkhat pawh kan hmu phâk si lova. Mahse, Pathian chuan kan kawng zawng zawng hi a hmu lâwk vek a, nang leh keia tana țha ber tûr hi min ruahman sak a, chu chu min pêk a duh ani.    

  

Keinin țha kan tih hi Lalpan țha a tih ani kher lo fo țhîn. Mahse, Lalpan țha a tih hi nang leh keia tan hian alo tha ber țhîn si a.

  

Mi tamtak in ,"Pathianin ka țawngțaina a chhang ve lo," kan ti fova, hei hi i hria ang u:

  

Pathian chuan tihtakzeta kan țawngțaina rêng rêng chhân loh a nei ngai lova. A chhânna țhenkhat erawh chu, "I tan a țha ber lo," tih emaw, "A rem hrih lo" tih ani țhîn.

  

Kan tana țha ber tûr hretu Lalpaah chuan châwl ila, Amah chu i nghâk fan fan zel mai ang u aw.

Article - "KRISTIANTE CHUAN KAN TI VE NGAI LO"

"KRISTIANTE CHUAN KAN TI VE NGAI LO"

  "Chutichuan, in ei pawhin, in in

   pawhin, in tih apiangah pawh

   Pathian ropuina tûr hlîrin ti

   rawh u" (1 Korinth 10:31).

  

Krista hming putute kan intih si chuan, kan awmdan, kan thiltih, kan țawngkam, kan engkim mai hi Krista Chanchințha nên a inrem a pawimawh takzet a. Kâwlkil thlenga a thuhretu kan nih avangin, inthlahdah thei kan nilo; khual khuaah emaw, pindan chhungril berah emaw pawh awm ila kan awmdan leh kan thiltih chu Krista Chanchințha nên a inmawi tûr ani, Krista hnung zuitu Kristian kan ni si a.

  

Sual ni lêm lova ngaih theih, mahse Kristiante tih atana mawi chiahlo pawh hi a awm a. Kan thiltih avanga tuêmawin kan Kristianna a hmuh hniâm phah theihna anih dawn chuan, chu kan thiltih chu "Pathian ropuina tûr hlîra tih" ani thei dawn em ni?

  

Miten ngaihloh lamah lo ngai lo se, chapona anga lo ngai palh an awm pawhin Lalpan min ngaidam se; a rei tawh bawka - ka inpuang lawk ang e - Pathian ropuinan leh Setana tih mualphonan:

  

Țûm khat chu kan Department in motor lian a rualin 3 kan lei a. A tîrah Chasis 3 kan lei phawt a, Private Firm pakhat chu a body-te kan sak tîr ta a. Hmanraw changkang tak tak supply nghâl tûr a keng tel nual bawk nên motor lian 3 leh hmanraw engemaw zat țheuh nên chuan a man chu a tam tham ve angreng a . Keimah tak chuan ka buaipui êm êm lo, mahse Client Department hotu ka ni ve a. Țûl lova tih khawtlai awm hauh lovin Contractor chuan Bill a rawn la ta ngei a. Lawm pawh a lawm khawp mai. Cashier te nên an indâwr fel hnuah Contractor chu ka Office roomah alo lût a, "Thank You Sir" tih pahin Cheng 500 clip pahnih (nuaih khat) chu ka dawhkanah a dah a, kal nghâl mai a tum a. "Mr. Biswajit, we Christians don't do this" (Pu Bisawjit, keni Kristiante chuan hei hi kan ti ve ngai lo) ka ti mai a. Thil ropui tak pawh ani lêm lo.

Mahse, he ka hmaa ding, Hindu sumdawng pa hian Kristiante danglamna hria se, chu hriatna avang chuan kan Pathian hming ropui se ka duh vang ani. Lehlamah chuan cheng nuaih khat chu ka thlahnih hlawh dâwn ani a. Ka awt alâwm, dik tak chuan keima pawisa a hlâwma cheng nuaih khat ka hmuh pawh ka la hrelo! Thamna pawh ani chiah lo; a hna zawng zawng a zo vek tawh a, Bill a la tawh a, ka office ațang khan Lengpuiah a chhuk anga, Gauhati panin a thlâwk mai dawn kha ani tawh a. Mahse, ka thinlung chhungril takah fuihna aw ka hre tlat. Ka Lalpa aw ngei ani a, 1Korinth 10:31 "in tih apiangah Pathian ropuina tûr hlîrin ti rawh u" tih hi min hriât nawn tîr nghâl bawk a. Khami tûk khan minute 5 chhung lekin cheng nuaih khat chu ka hnâwl fel dêr a, mahse chu minute 5 chhung vêk chuan Kristian ka nihna ka lantîr ta a; chumi avanga Lalpan hlimna leh engthâwlna min pêk hi cheng engzat mahin a lei zo lo ani.

 

"Lal Isu, nangmah nêna kan tihdun theih loh thil rêng rêng chu ka tih bîk phal suh ang che." Amen.

Sermon - PATHIANIN ȚAWNGȚAINA A CHHÂN DAN CHI HNIH

PATHIANIN ȚAWNGȚAINA A CHHÂN DAN CHI HNIH:

 

Lal Davida chuan, harsatna a tawh apiangin, Pathian a râwn a, a țawngțai țhîn. 2 Samuela 5: 17 ațanga 25 inkar zawng kha chhiar ila: Philistin hovin Davida chu Israelte lal atan hriâk an thih tih an hriât veleh Philistia mi zawng zawng chu Davida zawng tûrin an chho ta a. Davidan a hrîat veleh enge a tih hmasak ber? A hmasa berah chuan a țawngțai ani. "Philistia mite bei tûrin ka han chho vang em? Ka kutah hian anni ho chu mi pe dawn em?"  tiin Pathian a rawn hmasa ani, tih (chang 19- na ah) kan hmu a.

  

Berâm vengtu naupang mai anih laiin, Philistia miliân Goliatha kha virvawm mai mai hmangin alo hneh tawh a. Tunah lal alo ni ta a. Tunah zawng, țhuang hnihin an bei ta! Baal-perazim lam ațang leh Rephaim ruâm ațangin.   

  

April, 1970 khan, Gen. Yaya Khan leh a hote - Pakistan sipaite hlauvin East Pakistan (tuna Bangladesh) ațangin Refugee tamtak India ramah an rawn lût zut zut a. Bengal, Tripura leh Assam Chief Ministerte an mangang a. India Sorkar laipui hnênah an mangan thu an thlen hlawm a. Prime Minister, Pi Indira Gandhi chuan indona puân mai a duh ta a; India Army Chief Gen. Sam Manekshaw chu a râwn a. India sipai hrât khawkheng leh huaisen tia kan hriat fo țhin Sam Bahadur meuh pawhin a vawikhatna ah chuan indo a finthlâk loh, tiin thurâwn a pe a. A chhan chu, a hunin a zir lo ani, ati. Fûr a ințan dâwn chauh a. Himalaya tlâng vûrte an tuiral țan mêk a, hmarchhak lamah Chinese ho lo luh theihna kawngte a pawp dâwn chauha, chutih laia India sipaite theihna zawng zawng Pakistan lama han hman vek kha a fuh dâwn lovin a hria ani. Ral rêl a thiam khawp mai! A ruala indona țhuang hnih beih chu thil duhawm loh tak ani rêng a.

  

Davida erawh chuan, duh thlan tûr a neilo. A hun pawh a sawn ve ngawt thei lo. Hmêlmate an inring ut tawh a, amah an zawng huai huai tawh, tih Bible in min hrilh ani. A mangang a, a țawngțai ta ta!

 

Davida țawngțaina chu Pathianin chi hnihin a chhang a:

 

1. Baal-perazim hmuna indona chu Lalpan a hnehsak a, "Lalpan ka hmêlmate chu tuikhuah sah ang maiin ka hmaah min tihdarh sak ta" tiin 2 Samuela 5:20 -ah amah Davida ngeiin a chhinchhiah a. He hnehna hi Lalpa hnehsak ani.

  

2. Rephaim ruâm indona ah ve thung chuan, Lalpan tihdan tûr a hriattir! "Han chho suh, an hnung lamah kal hual la, thingtheihmu kûng zâwnahte han bei rawh" (2 Samuela 5:23) ati daih! Beih dân tûr a hriâttîr avanga hneh ani ve thung!

  

Davida Pathian hi vawinah pawh kan Pathian ani a, ala danglam rêng rêng lo. Amah ngeiin chawp leh chilhin keimahni țawngțaina emaw, a mi hmante kal tlangin emaw,  min tihsak chang a awm a. A paltlang dan min hriâttîr zâwk chang a awm bawk.  

  

Mi tamtakin min tihsak vek hi kan beisei fo; a lanchhuah nghâl loh chuan kan ringhlel nghal mai. Kan thatchhia ani, tihna mai ani.

  

Țawngțaia amah râwn chhunzawm zêl chunga kan hneh ve tûra min chhânna aw chu ngaihthlâk i ching ve tawh ang u.

      

Lalpan malsâwm rawh se.