Christmas thlîrlêtna- HERODA CHIBAI BÛKNA

Christmas thlîrlêtna-

HERODA CHIBAI BÛKNA:

    "Chutih lai chuan Herodan,

     mi fingte tihder a nih a inhriat

     veleh a thinur ta êm êm a,

     mi a tir a, a hun lai tak thu

     dîlchhût taka mi fingte a zawh

     ang khan, Bethlehem khua leh

     a vêl zawng zawnga mipa naupang

     kum hnih achin hnuai lam chu an

     zain a that ta vek a."(Matt. 2:16)

 

Christmas 2016 chu kan lo hmang zo ta a, nausên Isua chibai kan lo bûk dan țheuhte han sawi khâwm liam liam a châkawm ka ti riau anih chu!

 

Kan hriat angin mi fingte hnenah khan Lal Heroda khan, "Kal ula, naute chu dîlchût takin zawng chhuak rawh u; tin, kei pawhin amah chu chibai ka rawn bûk ve theih nân, in hmuh veleh mi rawn hrilh ang che u," ati a (Matt. 2:8). Mahse, mi fingte hnênah Lalpa thu alo thleng a, nausên chu Herodan thah a tum avangin kawng danga haw tûra tih an nih angin, kawng dangah an hawnsan ta a, tih Bible in min hrilh a.

 

Herodan mifingte lo lêt leh a nghah chhung hi Bible hian a sawi chiah lo nain, nausên kum hnih chin a suât tîr dânah hian mi fingten a ina an rawn zawn zan ațanga hun engemaw chhung chu a nghâk ve ani, tih a hriat theih a. Lal Isua chu a thih ve ngei a duh avangin a huam zau hret pawh ani thei e, kum hnih chin hnuailam a huam vek tîr danah hian. Nau piân zan ațanga chhiârin thla hnih emaw thla thum tal chu a liâm mai thei ani, nausên suat zai a rêl meuh hi chuan, tihte ka ngaihtuahnaah a awm a. He thla hnih thla thum chhung hian Heroda rilru chu a rûk takin a hah ve viau ang, tih chu a hriât ani. Heroda rilru hahna leh keini kan rilru hahna khâikhinna -

   

Heroda: "Mi fingte chu an lo kîr

            ang em, kîr lo ang em?"

            (Keini: "Ka rai ang em, rai lo ang em?!")

 

Lal Isua piân zana Heroda thil tih - nausên chibai bûk tumna leh nausên zawng zawng suât tûra thu a pêk hi ngaihtuah chiang reuh reuh ila: Lal Isua piân zana kan thil tih leh ahnu thla hnih thla thum hnua kan thil tih râpthlâk tak - nau tihthlâk hi a hun pawh a inhmu viau âwm e!

 

Lal Isua piân kan lawm paha kan thil tih avanga thla hnih thla thum hnua nausên suât hun alo thleng țhîn hi chu aw...! Heroda kha dem tûr kan awm bîk em le?!

 

Kan fîmkhur sênloh vangin a rûk tein rilru hrehawm takin period kan han miss a, thla hnihna ah kan in rinhlelh a zual a... a rûkin kan han confirm a, tichuan nausên suât zai kan rel ta țhîn a! February, March, April vêlah chuan kan Damdawiin hotute leh Private Clinic neitute hian sawi duh se, a râpthlâk ngawt lovang maw?

   "Chibai bûkna râpthlâk pêk tumin an chhuak ta!"

 

Lal Heroda ang mai hian, nausên suât zâwngin Lal Isua kha chibai ilo bûk ve loh hrâm ka beisei e.