Article - "KA HUNTE NANGIN I VAWNG A"

"KA HUNTE NANGIN I VAWNG A"

  

Khawvêl hunbi kan chhiâr a, ni leh thla leh kumte an inher liâm zêl a, kumhlui kan thlah a kumthar kan lâwm a. Mi hmasate an liâm a, țhangtharten an hmun kan luah zêl a. Heti rêng rêng hian eng chena rei nge kan lo awm tawh aw?

  

Heti zâwng hian kan ngaihtuahna ilo sêng lawk teh ang u. Lal Isua piân ațang ngawt pawhin kum zabi 21na kan hmang mêk ta chu ani a, kum 2,000 leh 17-na chu. Lal Isua piân hma lam khawvêl hun chhiârtu Bible zirmite chuan Adama leh a thlahte damchhung an han belhkhâwm thla zêl a, Adama ațang ngawt chuan kan khawvêl hi kum 7,000 bâk ani theilo niâwm tak ani. Chuti anih chuan, kum 7,000 leh 2017 belhkhâwm ila, mihringte hian kum 9017 chhung chauh he khawvêl hi  kan lo la luah tihna alo ni a. Chutih laiin Scientist te chuan leilung upat zâwng hi kum tlûklehdingâwn 4.543 vêla upa niin an chhut bawk a. Kum tlûklehdingâwn 4.543 ațangin 9017 chu han paih ila, leilung hrim hrim hi upa tawh hlê mahse, mihringte leh nungchaten kan luah chhung hi alo la rei lo phiân tihna ani a. Chuti anih chuan, Genesis 1:1- 2 "A tîrin Pathianin lei leh vân a siam a. Tin, lei hi a chhia a, a ruak ngawt ani a; tui thûk tak chung chu a thim mup a. Pathian thlarau chuan tui chungte chu a awp reng a." tih leh Genesis 1:3 a 'Tin, Pathianin, "Êng lo awm rawh se,"  atih inkarah hian kum tamtak a tla niin a lang!

Bung 1-na chang 2-na a kan hmuh: lei chhia, ruak ngawt mai, tui thûk tak leh thim mup mai Pathian thlarauvin a awp reng chhung hian hun rei êm êm mai chu nungchate leh mihringte lo la awm hma daih tawh ațangin Pathian thlarau chuan leilung hi a awp a, chumi hnuah chuan leilung leh vân boruak leh a chhûnga thil nungte hi ni 6 chhungin a siam chauh tihna alo ni a! Bible leh Science hi a inmil lo ni lovin, mihringte awm hma daihin leiung ruak  leh Pathian chenna Vânram chu an awm tawh tihna mai ani. Hun ruak rei êm êm mai lo awm ta anga lang chhungah hian Pathian chuan enge atih rêng rêng le, tiin kan ngaihtuah ngai em? Tui thûk tak thim bawk si chu kum tlûklehdingâwn engemaw zat chu a awp ta reng em ni ang? A dik. Vânah ro a rel pah bawk. Mihringte ala siam loh avangin, mihring vanram kai an la awmlo, an la telve lo. Vântirhkoh, Sefafîm leh Cherub te an ni.

  

Bible dawttu ang hiâl a kan sawi fo John Miltona ziak, PARADISE LOST ah khan 'Vân Indona' chanchin ngaihnawm tak mai kan chhiar țhîn a. Tah chuan leilung hi khâidiât hrawl takin a inkhai angin a sawi a. Vâna vântirhkoh Lucifera chu Pathian lakah a hel ta a, ani chu Pathian bodyguard Michaelan a hneh tâkah khan chu hmun chhia, thim mup maiah chuan Lucifera leh a hote chu paihthlâk an nih kha! Hetah hian Vânram erawh chu a awm tawh, kan tih tawh kha a. Vâna vântirhkohte pawhin Pathian hovin ro an lo rêl reng tawh tih kan sawi khi a ti fiah sawt âwm e. Lucifera leh ama ruala vantirhkoh hel ve te an paihthlâkna hmun leilung chhia leh ruâk ringawt mai, tuipui thim mup mai chu Pathian chuan Khawmual, Tuifinriat leh Vân Boruak ahte a țhen hrang ta chauh tihna alo ni a. Chuti anih chuan, kan leilung pawh hi a upa êm êm tawh tinhna ani a, a ral leh țêp tawh zâwk tihna pawh ani. Lei thar leh vân tharin a rawn thlâk anga, hunbî a awm tawh lovang!

  

Pathian chuan hun tîr ațangin kum tlûklehdingâwn tamtak chhung leh mihringten leilung kan luah hun chhung tûr ( Adama atangin alo kal leh hma loh chhung) leh  lei thar leh vân thar a siam leh hma loh chuan kan hunbi te hi a vawng khiau a, chu chu CHATUAN kan tih hi ani!

   Hla siamtu chuan,

   "Ka hunte nangin i vawng a

    Ka hun zawng i ruat  a ni;

    Nangmahin hun bîte i siam,

    Khawvêl ni leh kumte chu." ati a.

  

Khawvêl ni leh kumte, tih hi mihringte hunbi chhiar chhûng tê chauh sawina ani. Leilung, tuifinriât leh vân boruak a țhen hran ațanga lei thar leh Vân thar inkar hun chauh, tihna. Chuvangin, Pathian tan chuan kum hlui leh kum thar a awm hranpa lova, amah chu a bul leh a tâwp ani a. Pathian kum chuan ral ni anei ve lo. Sam ziaktuin, "Nang erawh chu i pangngai fova, I kumte chuan ral ni reng a nei lovang." (Sam 102:27) alo ti ani!

  

Keini ngei pawh hi, kumten ral ni an neih lohna leh hunbî rêng rêng an chhiar tawh lohna hmunah chuan kan la awm dâwn chiang khawp a, Chuvangin, hlathu hmanga Pu Rokunga zawhna siam hi kan chhân thiam a pawimawh hle ani-

   "Aw hun, aw hun

    Chatuan khua vârna chu;

    Chatuan, Chatuan

    Aw hun danglam tawh lohna chu!

    Aw ka thlarau,

    Tahchuan khawiah nge i awm ang?"