Article - "KAN ZÎNGA I TEL VE ZÊL SI LOH CHUAN HETA TA HI MIN HRUAI CHHUAK MA TA CHE":

"KAN ZÎNGA I TEL VE ZÊL SI LOH CHUAN HETA TA HI MIN HRUAI CHHUAK MA TA CHE":

           

Christmas kan hmang zo chauh a; kan hma lawkah kumhlui thlah liam a, kumthar lo inher chhuâk tûr hmuâk tûrin kan inbuatsaih leh mêk ani a. "Kumthar lo thleng tûr hian eng ang vanneihna nge a rawn thlen ang a, eng ang vanduâina nge a rawn ken tel bawk ang aw?" tiin ka rilru a vâk vêl nasa khawp mai a.

   

Kumhlui kan thlah liâm mêk hi țhenkhat tan kum chhinchhiah tlâk tak leh uiawm tak ani thei a. Chutih ruâlin țhenkhat tan erawh chuan kum chhia, liâm thuai thuai se kan tih ngawih ngawih pawh ani thei bawk a. Egpawh ni se, mi tupawhin kumthar lo inher chhuâk tûr hian malsâwmna rawn thlen țeuh se, kumhluia kan lungchhiât vanduâinate kha kum thar, hun tharah chuan tawng tawh lo hrâm ila tih hi kan beisei leh kan thlîr lâwk dan ani a.

  

Exodus bung 32 leh bung 33 hi chhiar chhuak ila,  Mosia awmloh hlana Arona hova Sebawng no lem an biâk thu leh Sinai tlang chhuahsan tûra Pathian thupêk chungchang ani a. Israel fate chuan Aigupta ram ațanga Pathianin a hruâichhuah ațanga Kanan ram an luh inkarah ringawt pawh khan vawi tamtak Pathian an ti thinur a, Pathian lakah an hel fova, Mosian nunna bu ata a hming thâibo hial pawh huama Pathian a kar țhin avang chauhin Lalpa chu a in hnûkdâwk leh țhîn ani, tih kan hmu a (Exodus bung 32:32).

   

Sinai tlang chhuahsana kal zêl tûra a tih ruala Mosia hnêna Pathian țawngkam hi Exodus bung 33:3 ah kan hmu a, "...Kei zawng in zîngah ka han chho ve dâwn lo ve, hnam luhlul tak in lo ni si a; kawng lakah ka ti boral hlauh dah ang che u," a ti a. 

  

Israel fate ang chiah hian Mizote pawh hi hnam luhlul tak kan ni, tihte ka rilruah alo lang a. Zoramah vawi tamtak harhna a thleng tawh a, Pathian thiltih mak tak tak sawi sênloh kan hmu fo tawh țhîn a, Revival Team engemaw zâtin min chawk harh mawlh mawlh reng tho chung hian kan ram sualna chu a kum têlin a pung zêl zawng anih hi! "Zoram mipui zât aiin piangthar an tam tawh zâwk" an tih fo te hi a awihawm rum rum tawh ani! Sualah kan tlu leh țhîn mai nilovin, sualna a pung tual tual a. A beidawn thlâk rum rum țhîn. Hnam luhlul tak chu kan ni ve  chiang alâwm. Pathian hian "...Kei zawng in zîngah ka han chho ve dâwn lo ve, (kumthar ah chuan ka lo tel ve dâwn lo ve) hnam luhlul tak in lo ni si a; kawng lakah ka ti boral hlauh dah ang che u,"  min ti ve ta mai se, Pathian tellovin kumhlui ata kumthar kan kai ngam ang em, tih hi kan ngaihtuah a țûl takzet ani! Mosia chuan Pathian tellova ram thar, hun thar kâi chu a zuam thlâwt lova, kal loh mai pawh a duh zâwk ani. Exodus 33:15 ah Tin, ani (Mosia) chuan a (Pathian) hnênah, "Kan zînga i tel ve zêl si loh chuan heta ta hi min hruai chhuak ma ta che." ati hial ani!

  

Keini pawh, kumthar hian eng thilte nge a rawn thlen dawn, kan hre hauh lo. Thil țha hlîr chu ani dawn hauh lo tih hi huaisen takin pawm ngam ila; kan khawvêl hrim hrim pawh hi a upain a tar tawh a, chu chuan chhiâtrupna thleng țhînte ati pung tual tual a. Khawvêl huap chu sawi loh, India ramah ringawt pawh hian kum khata mitthi zat (mortality rate)  a sang viau lehnghal: kum khatah mi 1000 zêlah mi 7 an thi anga chhût ani a, ni khatah mi 22,500 zêl an thi tihna ani! (Source: CIA World facebook)

  

Heng chhiâtna leh thihna lo thleng țhînte hi khulam Vaiho chan chauh ani lo, kan ta pawh ani - entîrnan kum 2016 December ni 27 thlenga Aizawl veng pakhat thlanmuala inphûm zat mi 60, an veng ațanga ruang phurhchhuah 13 an tling nia!

  

Chuvangin chhiartu duhtak, keini pawhin, "Kan zînga i tel ve zêl si loh chuan heta (kum 2016) ta hi min hruai chhuak ma ta che," ti khawpin Lalpa kan Pathian i kar ve ang u; chutichuan, "In zîngah ka tel zêl ang a; ka chawlhtîr ang che u" ( Exodus 33:14) min ti ve mahna.