Article - KA LALPA CHU A MAWI BER E

KA LALPA CHU A MAWI BER E

  

THE PASSION OF THE CHRIST tih film ka en hmasak ber țum chu ka țhiante inah ani a. A tluan pawhin ka en peih ta lo nghe nghe a. An sawisa nasa mah mah lo maw, naupang leh hmeichhiate en atan phei chuan an sawisak dânte khi a râpthlâk lutuk, tihte ka ngaihtuah bawk a. A changtupa lah chu a hmêțha fahran lova. Mel Gibson hian Isua lem meuh chang tûr chuan Jim Carriezel aia piân nalh leh hmelțha hi thlan tûr a hmu ngang lo em maw ni? Rom sipaihovin an vuak laia a țhen lai hmêl te kha ka ngei zawng tak ani. A mit lah chu a in zîm hleih vêl; Isua a ang pawh ka ti eih lo. Khitiang khi Isua ani theilo, tihte ka ngaihtuah nasa mai a.

 

A hnu daih thlengin ka rilruah a cham tlat mai. Kha film a Isuaah khan ka lung a awi thei tlat lo anih chu! A chhe lutuk mawlh kha!

 

Tûn hnuah hian ka lo tisual nasa hlê mai tih ka hrechhuak ta a! Lal Isua an khenbeh laia dêusawh taka thlîrtute nên khan ka lo danglam lo rêng rêng ani; khami ni khan Jerusalemah awm ve ni ila chuan Juda mipuite leh Puithiamte zîngah tel vein Lal Isua hmusit tute lamah ka lo awm ve dawn reng alo ni, tih ka ngaihtuah ta hlauh a. Chu chuan inthiamlohna lian tak min neihtîr ta zâwk a. Isaia ziak 53:5 ah "Nimahsela, ani chu kan bawhchhiatnate avângin hliâmin a awm a, kan khawlohnate avângin vuak thitlinin a awm a; kan thlamuanna tûra thununna chu a chungah a tla a, a vuakna vualtea tihdamin kan awm ta." tih hi keimahah a fiah ta hle mai. Keimah vang alo ni reng si a!

  

Isua kha keimahah ka in chantîr thiam chinah chuan mittui tla lovin ka en tluân thei tawh lo ani! A hmêl chhiatnate, amaha duhawmna pakhat mah a awmlohnate, ka hmêl ngei zawng tak anihna te kha keima nihna vek alo ni!

  

Ka nihna zawng zawng amaha inbel kha ka va hmusit leh si anih chu !

   "Ani chu kan bawhchhiatnate avângin hliâmin a awm a, kan khawlohnate avângin vuak thitlinin a awm a; kan thlamuanna tûra thununna chu a chungah a tla a," chuti chung chuan ka la hmusit zui a!

  

Buongliênkunga hla, "Ka damna dingin thi chen ilo tuor si," tih ang khan, naupang leh hmeichhiate hmuh atan phei chuan an sawisak dânte khi a râpthlâk lutuk, ka lo tih ve ngawt te kha, tihdama ka awm theihna tûr alo ni reng si a!

  

Tunah zawng, thlîrdan dikin ka thlîr thei ta, ka hrethiam ta e; keimah vânga a tuârna zozai kha he film hian a phawk zo lo fe zâwk alo ni!

  Ka Lalpa chu a mawi ber e

  Hlîng lukhumin phuâr vêl mahse!