Tuesday, 10 January 2017

Kumhlui thlahna: "HUNTE AN INHER LIÂM ZÊL A"



Kumhlui thlahna:
"HUNTE AN INHER LIÂM ZÊL A"-

   "Hunte an inher liâm zêl a
     Lei pangpar mawite an chuai e;
     Chutin kan hlimlai nite pawh
     Hmatakin an ral leh țhîn!"
                                           - Rokunga
  
Kumhlui thlah tlaiah kanu in, "Naktûkah chuan kum khatin i upa sawt tawh anga," atih te, ka pain "Vawin hi naktukah chuan nakum ani daih tawh dâwn a.." min tih a, mak kan tih êm êm țhin laite kha nimin ang mai ala ni! Tûnah chuan khatih hunlaia keimah ang rual tê tê kha keima fate ka kâi ve diah diah tawh a; ka nu leh ka pa pawh thlânah ngawi rengin an zal ta a! Hun hi a va kal chak êm ve aw! Khawvêla ka pangpar mawi berte zîng ami - ka nu leh pa chu chuaiin mual an liâm tawh a, tûna hlim êm êma ka fate nêna hun kan hman țhinte pawh hi hriâtloh karah an la ral dâwn chu ani si a! Țhenrual duhte nêna kan hlimlai nite pawh hi "hma takin"  an ral zêl zawng anih hi!
 
 Eng hi nge hringnun hlutna chu ni ta ang le?
           
"Aw! Engan nge maw khuanu hian,
            Hringnun hi alo duân le?
            Thâmral leh mai tûr hianin maw?
            Duh vâng rêngin kan piang si lo!"
 
Kan vânglai nite a ral hma ngei hian, kan nakin hun kan chhût thiâm alo pawimawh hlê mai. Nakin lawkah chuan, keimah pawh hi "mitthi" ka lo ni anga, kan in chu "khawhar in" an la ti anga. Kar lovah miten min lo theihnghilh tawh anga. Tah chuan, chatuan pawha ral tawh lo tûr, keimah tak tak zâwk - ka thlarau hi khawiah nge a awm tâk ang le?
 
Pu Rokungan he zawhna pawimawh tak mai hi hlathu hmang vêkin a rawn siam a:
   
"Aw Hun,  Aw hun,
            Chatuan khua varna chu
            Chatuan, Chatuan
            Aw hun danglam tawh lohna chu;
            Aw ka thlarau,
            Tahchuan khawiah nge i awm ang?",    tiin.
  
Chhiartu duhtak, kum hlui a liâm mêk a, kum thar 2017 chu naktip lawkah a rawn inher chhuâk dâwn ta. Hun leh kumte an inher liâm zung zung țhîn ang hian keini pawh kan liâm hun alo la thleng thuai dâwn. Chatuana kan awmna tûr kan thlan thiâm ava pawimawh êm! Chu Chatuan ral thei lovah chuan hmun țha chang ve ngei tûrin kan hunte Lalpa duhzâwngin i hmang țha ang u.
   
"Kan damchhung nîte chhiar dân tûr min zirtir ang che, finna thinlung kan neih phah hial na tûrin." (Sam 90:12)

2 comments: