Article - BETHPHAGE SABENGTUNG NOTÊ

BETHPHAGE SABENGTUNG NOTÊ

            Tûkkhat chu, Oliv tlang ațanga hla vaklo, Bethphage khuaa awm Sabengtung notê chuan, a nu hnenah, "Hmân nia ka kalnaah khan ka zuk kal leh teh ang; a nuam êm mai!.." a ti a: tichuan Jerusalem panin a kal leh ta a. Mahse, a kal hmasak ni ang alo ni ta hauh lo mai! Mite chuan an lo vua a, lung te'n an lo vawm a, an lo ûm ta hrep mai a. Sabengtung notê chu lunghnûr takin a tlan haw ta a. A nu hnên a thlen vêleh chuan, "Hmânni kha chuan ka kalna tûrah puan te an lo phah a, Tumkau te kengin min lo lâwm a. Vawiin erawh chuan lungin min lo vawm a, min vua a, ka rawn tlânchhe haw ta a ni!" a ti a.  

            Anu chuan, "Mate, hmânni kha chuan i chungah Lal Isua a chuang tlat alawm!" tiin a hrilh ta a.

            Keini mihringte pawh hi Lal Isua nên chauh kan lo mawiin kan lo ropui ve țhin mai a lo ni a, Lal Isua tel lova kan kal erawh chuan engkim hi a hlauhawm ani!

            Lal Isua chauh hi ani, kan ropuina leh châwimâwia kan awm ve theihna chu. "Keimahah awm reng rawh u, kei pawh nangmahniah ka awm reng ang...keimah lovin engmah in ti thei si lo." ati mawlh mawlh rêng ani.  

                                     (Johana 15:4,5).