Article - LEI CHI IN NI E

LEI CHI IN NI E

"Lei chi in ni e; nimahsela chi hi a dâk

 tawh chuan engin nge an tihal leh

 ang? Chuta chinah chuan paih

 chhuaha mihringte rah mai mai

 chauhvah lo chuan eng atan mah

 a tlâktlai lo." (Matthaia 5:13)

  

            Kan Lalpa hian chi (table salt) hmang hian thil tamtak min zirtîr a ni; chumi hre fiah tûr chuan chi țangkâina kawng hrang hrang tlêmte heti hian ngaihtuah ho ta ila:

  1. Chi chu thil vawng țhatu a ni: Eitûr kan dahțhat dâwnin chi nêna hmeh hrepin a țha rei duh bîk a, a vawng thianghlim bawk. Kristiante chu he leiah hian mihringte mimal leh khawtlang nun chhe mai tûr vawng țha tlat tute kan ni.

  2. Chi chu eitûr ti tui tu a ni: Kan thil ei rêng rêngte hi chi tello chuan a tui meuh lo. Mitin mai hian kan ngaina ani. Chutiang bawkin Kristian piangthar diktak chu mite tan a ngainatawm a, a bula awm chu nuam an ti țhîn.

  3. Chi chu thil dangte něn a inrem: Thil hang a ni emaw thei thûr a ni emaw, chi nên a inrem a, a ti tui êm êm zêl a; thil thûr-thlum suk te hi alo tui viau zêl thova. Rem loh tak tak pawh a nei meuh lo. Kristian chuan a bula mite apiang a mil in, a  inrempui tûr a ni.

   4. Chi chu hliam damdawi a ni: Kan naupan lai chuan thingtlangahte kan awm a; pemah chi min hnawihsak fo. A punlun tûr a veng a, a tidam hma bîkin an sawi țhîn. Kristiante chu țhatna hmanga mite taksa leh rilru hliam tawh hnu tih damsak thei tûra beisei kan ni.

   5. Chi hi thil tlâwm tak ani: Khawvêl mihringte hi khawi hmunah pawh chi tellova awm thei kan awm lo. Chuti chung chuan, kan nitin mamawhte zînga thil man tlâwm ber a ni, kan ti thei ang: a pawimawh zia ngaihtuahin. A tellova kan awm theih, rangkachak ve lêm hi a to êm êm lawi si a! Kristian nun chu a tlawm a, a inngaihlu ve ngai lo.

  6. Chi chu a eitu apiangin an kâwk țhîn: Dawhkânah chi kan chhawp a, kan zungchalin kan kâwk a, a hmâwra kai chu kan liâk țhîn. Zungchala inkawh chuan demna, hêkna, sawisêlna, hmuhsitna thlengin a entîr a ni. Miin min kawh sawk sawk chuan tupawhin kan hua. Kristian chu, mimal leh khawtlang nun vawng țhatu, kawm nuam tak, remna siamtu, mite natna thâwi damtu, mi inngaitlâwm a ni. Mahse, a eitu ten an kâwk țhîn!

            Kristian unau duhtak, Lalpa Isua Krista hminga i țhatna leh i felna zar zotu zozaite khan, i mamawh ni-a an phatsan che a, an dem che a, an hêk che a, an hmuhsit hunah che chuan, "Lei chi in ni e" tih hi lo hre țhîn ang che.