Article - "KA HUNTE NANGIN I VAWNG A"

"KA HUNTE NANGIN I VAWNG A"

            Khawvêl hunbi kan chhiâr a, ni leh thla leh kumte an inher liâm zêl a, kumhlui kan thlah a kumthar kan lâwm a. Mi hmasate an liâm a, țhangtharten an hmun kan luah zêl a. Heti rêng rêng hian mihringte hi eng chen nge kan lo awm tawh aw?

            Heti zâwng hian ka ngaihtuah mai mai a: Lal Isua piân ațang ngawt pawhin kum zabi 21na kan hmang mêk ani a, kum 2,000 leh 17-na chu. Lal Isua piân hmalam khawvêl hun chhiârtu Bible zirmite chuan Adama leh a thlahte damchhung an han belhkhâwm thla zêl a, Adama ațanga chhût chuan mihringin he  khawvêl hi kum 7,000 bâk kan lo la luah lo niâwm tak ani a. Chutih laiin Scientist te chuan leilung upat zâwng hi kum tlûklehdingâwn 4.543 vêla upa niin an chhut bawk a. Anih chuan, Genesis 1:1- 2 "A tîrin Pathianin lei leh vân a siam a. Tin, lei hi a chhia a, a ruak ngawt ani a; tui thûk tak chung chu a thim mup a. Pathian thlarau chuan tui chungte chu a awp reng a." tih leh Genesis 1:3 a 'Tin, Pathianin, "Êng lo awm rawh se,"  atih inkarah hian kum tamtak a tla niin a lang!

               Bung 1-na chang 2-na a kan hmuh: lei chhia, ruak ngawt mai, tui thûk tak leh thim mup mai Pathian thlarauvin a awp reng chhung hian hun rei êm êm mai chu mihringte lo la awm hma daih tawh ațangin Pathian thlarau chuan leilung hi a awp a, chumi hnuah chuan lei leh vân leh a chhûnga thil nungte hi ni 6 chhungin a siam chauh tihna alo ni! Bible leh Science hi a inmil lo ni lovin, mihringte awm hma daihin lei leh vân a awm tawh tihna mai ani. Hun ruak rei êm êm mai lo awm anga lang chhungah hian Pathian chuan enge a tih rêng rêng le, tiin i ngaihtuah ngai em? Tui thûk tak thim bawk si chu kum tlûklehdingâwn engemaw zat chu a awp ta reng em ni ang? Bible dawttu anga kan sawi fo John Miltona "Paradise Lost" ah khan Vân Indona chanchin ngaihnawm tak mai kan chhiar țhîn a. Tah chuan leilung hi khâidiât hrawl takin a inkhai angin a sawi a. Vâna vântirhkoh Lucifera chu Pathian lakah a hel a, ani chu Pathian bodyguard Michaelan a hneh tâkah khan he hmun thim mup maiah hian Lucifera leh a hote chu paihthlâk an nih kha! Hetah hian Vân erawh chu a awm tawh a, Vâna vântirhkohte pawhin Pathian hovin ro an lo rêl reng tawh tih kan hre thei âwm e. Chutichuan, kan leilung hi a siam ta a. Kan leilung pawh hi a upa êm êm tawh a, a ral leh țêp tawh zâwk ani. Lei thar leh vân tharin a rawn thlâk anga, hunbî a awm tawh lovang!

            Pathian chuan hun tîr ațangin lei thar leh vân thar a siam leh hma loh chuan kan hunbi te hi a vawng khiau a, chu chu Chatuan kan tih hi ani!

    Hla siamtu chuan,

   "Ka hunte nangin i vawng a

    Ka hun zawng i ruat  a ni;

    Nangmahin hun bîte i siam,

    Khawvêl ni leh kumte chu." ati ani.

            Chuvangin, Pathian tan chuan kum hlui leh kum thar a awm hranpa lova, amah chu a bul leh a tâwp ani. Pathian kum chuan ral ni anei ve lo. Sam ziaktuin, "Nang erawh chu i pangngai fova, I kumte chuan ral ni reng a nei lovang." (Sam 102:27) alo ti ani! 

   Nang leh keia tana zawhna pawimawh ta ber mai chu hei hi ani-

   Chu chatuan hun danglam tawh lovah chuan khawiah nge i awm ang?