Article - KA CHHANDAMNA ZION TLANGAH CHUAN RAWN HRUAI LA

KA CHHANDAMNA ZION TLANGAH CHUAN RAWN HRUAI LA

"Kan la chak loh lai khan, a hun tein Krista chu mi sualte ai chuan a lo thi ta si." (Rom 5:6)

            Tûnhnai maiah khan Aizawl veng pakhata an YMA hruaitute chuan an veng chhunga ruihtheih thil ti țhînte vâi khâwmin an YMA hall ah an khung khâwm a; Gospel Camping an neihpui ta a. An ti țha ka tih êm avangin ka va chhim ve a, beisei loh lutukin thusawina hun pawh min lo pe ve nghe nghe a. Chutia thu sawi tûra ka dinchhuah chuan, ka hmazâwna Campers ho hmêl chuan ka rilru a khawih tlat anih chu! Zu seh hmêl leh addict vung chêr chur, an taksa duk thliah thluah engemaw zat an țhu tlar dal ka hmuh veleh chuan ka rilrua ka thu sawi tum zawng zawng a bo vek mai a! Hla tlar hnih chauh mai hi ka bengah a ri tlut tlut mai zuk nia! Ka chhandamna Zion tlangah chuan rawn hruai la,An tan hmun nuam leh hahchawlhna ka buatsaih e;

            Ka hmazawna YMA țhutthlêng ațanga min thlîr țhap tute chu Lal Isua ngeiin a chhandamna thu leh an tan hmun nuam leh hahchawlhna a buatsaih asin, tih leh; zing thawhhlim lunat ber bur awm tawh lohna, chawei tuilo luâk chhuak emaw loh theih lohva suffer hlauh vanga rûk rûk a țûl tawh lohna hmun a buatsaih sak thu sawi tûrin min ti ani, ka ti lo thei lo ani; an chaklohnate avanga Krista chu an ai a thih thu chu! 

            Chuvangin, ruihhlo ngaite leh mi hlaten Lal Isua chanchințha an hriâtchiân a, an inlamlêt a, "Kei zawngin Pathian ka ko vang a; Tichuan LALPAN mi chhandam ang." (Sam 55:16) tia Piantharna an chang lai hmuh hi a nuam ani!

            Addict ho pual Camping chhim nuam ka tih êm êm chhan pakhat chu hei hi ani: Taksaa sual vuâkna hliam hnuhma pu khat vek, duk cher chur, vung lêk lûk leh zantam pawh pâi tawhlo tûr hmêl putu ten, bianga mittui luang zawih zawih chunga Lalpa an au lai hmêl hi khawvêla thil hmuhnawm ber ani, keimahah chuan! 

 

            Hetiang mite hnênah hian Lalpa chuan, vut aiah pangpar țhi, lungngaih aiah hlimna hriâk a pe ta zâwk a. An hmabâk damchhung hun an la neih chhun chhunahte chuan, "Nunna thing Lalpa phunte" an ni tawh dâwn si a.