"MIPUITEN
TUNGE A NI MI TIH?"
"Tin, heti hi ani a, Isua amah chauha a
țawngțai laiin a zirtîrte chu a hnênsh an awm a; an hnênah, "Mipuiten tu
nge a ni min tih?" tiin a zâwt a (Luka 9:18).
Lal
Isua zawhna khi keimahni pawh kan in zawh nawn fo a pawimawh hlê a ni; hemi
chungchangah ka experience tawitêin ka rawn sawi lawk ang e:
"Mipuiten tu nge a ni min tih?"
Hmanni
lawk khan kan thawhpui, kan țhian ni bawk chuan an in thar an luah lût a. A
lawmnan a thawhpuite chu chaweiah min sawm hlawm a. Office ațangin eirawng
bâwlpui tûrin a țhen chu an lo va kal hmasa a. Kei leh Staff dangte erawh chu
Office bâna phei mai tûr kan ni a.
Tlailam dar 4:00 alo ri a. Ka phone chu a
rawn ri ral ral a,
"Kan lo ring che ania aw?"
"Eng thilah?"
"Hunserh hmang tûrin!"
Phone
ka dah hnu chuan ka rilru ngaihtuahna a kal thui khawp mai a, helai Bible thu
hi ka rilru ah alo lang zawk mai anih chu! Luka 9:18 thu - "Mipuiten tu nge a ni min tih?"
Tûnhma
zawng pawhin vawiin anga chawei khâwmna ah hian ka telve fo tawh a. Chutiang
hunahte chuan, kal dâwn țêpah ka țhianten min rawn phone anih chuan,
"Kan
lo ring che ania aw?" an rawn tih rêng rêngin, "I zu rawn ken tûr kha
kan ring ve nghâl e," an tihna emaw, "Rawn ngaihtuah ang che
aw," min tihna a ni ziah a. Khatih hunlai kha chuan mite min hmuhdân chu
zu kengtu, awlsam taka zu lâkna hria, chaweikhâwm nikhuaa zu in ngei ngei tûrin
min hmu țhîn a. Min hmuhdan chu zu heh tak niin min hmu a ni. Dik pawh a dik a
ni. Hemi ni erawh hi chuan min lo rin na chu "Hunserh hmang tûrin" a
ni ta daih mai! Hniâl phal chi a ni in ka hre lova; ni dangah fiâmthu pawha min
la sâwm ngai lohna thil a ni a.
Mite
min hmuhdân alo dang ta lutuk chu keimah ngei pawh chuan mak ka ti a. An neih
zawng zawng takmeuh senga an sak, an in thar lawmnaa țawngțaina hun hmang tlâka
min hmuhna chu ka awih lo nge ka awih ngam lo zâwk aw?! Keimah leh keimah ka in
en a, Paula țawngkam takin, "hmanah sawichetu leh tiduhdahtu leh sawisatu ni mah ila, rinawma mi ngaiha, a
rawgbâwltua mi ruat tâk avâng hian,"(1Timothea 1:12,13). phûr takin, zak
chung chung siin, hunserh chu ka hmang ta a. Ka vawikhatna a ni!
He
sabengtung ang, ransa azawnga ran mâwl ber leh hmuhsitawm ber mai keimah hi, ka
chunga chuang ta Lal Isua an hmuh zâwk
avangin ka lo mawi ve ta a! "Lalpa, ka lâwm e," tiin, thinlung takin
ka țawngțai ta a ni.
Mipuiten tu nge a ni an tih che?
No comments:
Post a Comment