ARTICLE - BAPTISMA AWMZIA: KEIMAHAH

BAPTISMA AWMZIA: KEIMAHAH

            Kohhran denomination hrang hrangte kan inhniâl fo na thupui Baptisma chungchang hi keimaha a thawh dan ka sawi ve lawk ang e; tu huâtthu emaw sawi tumna lampang ni lovin. Baptisma chu kan chang ngei tûr ani a, kan chantîr ngei bawk tûr ani; hei hi Isua thupêk ani tlat, hniâl chiâm tûr a awmlo. Matthaia 28:19 - 20 ah, "Chutichuan, kal ula, hnam tina mi zirtîrah te siam ula, Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,"  a ti ani.

            Kei chu Baptist kohhran inenkawlna hnuaia seilian ka ni a, chuvangin 'immersion in water', hnim pila baptisma chang ka ni a. Ka nu leh pate kha Kohhran pawl danga awm ni sela, tui thlawr emaw puanzâr hnuaiah emaw pawhin ka chang ngei ang. Isua thihna leh thawhlehna țâwmpuitu ka nihna mite hmaa ka puânchhuah ve na ani a, ka awmna lei Kohhran dan ka zawh kimna ani. Chhandam ka nih leh Chhandam ka nih lohna erawh a keng tel kherin ka ring tlat lo. Ephesi 2: 8 ah rinna avanga khawngaihnaa chhandam ka nih thu leh, ka thawhchhuah anih loh thu min hrilh ani. Isua Krista chu ka ring a, khawngaihna avanga chhandam ka ni - Kraws thihna ah khan. In hniâl sateh țhîn mah ila, Pathian policy chu a pangngai reng - "Chhandamna chu Kros ani!"

            Baptisma chu ka lo chang ta a; Krista rualin ka mihring hlui chu a sualna leh bawlhhlawhna zawng zawng nên, a thi ve ta a: dîlah emaw, tuiah emaw puanzâr hnuaiah emaw khan. Rom 6:3-4 ah, "Keini zingah Krista Isuaa baptisma chang apiangte chu a thihnaah baptisin kan awm tih in hrelo emaw ni.  Chuvangin a thihnaah baptisma kan chanin, a hnêna phûm vein kan awm; Pa ropuinain mitthi zîng ata Krista a kaihthawh ang khan, keini pawh nunna tharin kan awm theih nan." a tih ang khan, tholeh Krista thawhlehna chu, a thianghlimna nên, țâwmpuiin taksa thianghlimin ka tho leh ta ani, tih zak miah lovin mite hmuhah ka lo puang ta a, taksa leh khawnvâr tehkhin thu ang khan (Luka 11:33).

            Chuti anih avang chuan, tûnhma zawng zawnga ka taksa ti bawlhhlawh țhîn tute kha ka tih emaw ka lâk luh a thiang tawh lova; ka ka (mouth) hian zu a in a rem tawh lova, dâwt a sawi thiang tawh lova, ânchhia a chhâk chhuâk thiang tawh lova, thu lawilo mai mai ka sawi a rem tawh hek lo. Chuvangin mite tana malsâwmna thu ka sawite leh ka țawngțai saknate pawh Pathianin a ngaithla ang. Ka kutte hi lehkha den nan, eirûk nan, zu no dawm nan, mi pawi khawih nan te ka hman a rem tawh lova, ka kut a thianghlim anih phawt chuan, ka fate lu chunga kut nghata ka țawngțainate pawh chhânin an awm ngei ang, tih ka ring tlat ani.

            Tholeh Krista taksa thianghlimna țâwmpuia nung tawh tûr ka nihna leh invawng thianghlim tûr ka nihna hi keima thinlunga Baptisma in min khawih dan chu ani.