Thursday, 2 March 2017

SERMON - I NUNNA TÛRIN TLÂNCHHUÂK RAWH



I NUNNA TÛRIN TLÂNCHHUÂK RAWH

            Fîmkhur rawh u; chuti lo chuan tu pawhin Krista thu ang ni lovin mihring thurochhiah leh khawvêl A AW B ang zâwkin, an thufing leh bumna mai maiin râllâkin an la dah ang che u" (Kolossa 2:8).

            December ni 7, 1941 khan Japan chuan thâwklehkhatah Pearl Harbour chu an bomb chhe vek a, a hnu darkâr tlêmte chhungin US Sorkarin Asia khawmual pumpui an vênhim phâkna tûra an buatsaih Phillipines thliârkar ami, Clark Airfield leh a hmuna indo thlawhnate chu a bomb chhe leh vek a. Britain leh a thuruâlpui Allied Forces ten thâwk lâkna hun pawh an neih hman hma hauhin December ni 10, 1941 khan Singapore lawngchawlhna hmuna British indo lawng liân pahnih, HMS Prince of Wales leh HMS Repulse te chu an tipil leh a. Japan chuan ni thum chhung lekin nasa tak leh mite mak tih khawpin Britain leh a thuruâlpui ramte chu "bumna mai maiin râllâk in an dah" ta ani!

            Prime Minister Sir Winston Churchill pawh a barakhaih nasa hlê a. Engtin nge, khawvêla Sorkar lian ber ber țangkawp, Great Britain leh US of A chu Japan khan thâwklehkhata khati taka a sawp chhiât theih mai le? Khawnge a sipai huaisen rualte, tank, lawng lian, jet fighter leh bomber zozai te kha?

            Eng dang vang ani lo, Pu Churchill; Japanese ho khan, tisa leh thisen maiin an bei lo che a, vân hmunahte awm thlarau sualho tactic diktak hmangin an bei che a, i inrâlring hman lo ani! (Ephesi 6:12).

            Japanese ho khan Kumpinu Sorkar kha a bum chiang asin! Tlâwm tûr ang deuhin an han awm a. An phal chin, an tâna pawi lutuk lo chinah an hnungtawlh duâi duâi a; Allied Commanderte chuan remthu sawi tûra palai an lo kal thuai an lo beisei țan tawh a, an sipaite pawh an inthlahdah tial tial a. PEARL HARBOUR tih film kha kan en tawh chuan, Hawaii thliârkar vêla Lawng Sipaite leh Khawmual Sipaite an inthlahdah zia kha kan hmuin ka ring, Picnic tûra kal te pawh an ang zâwk!

            Chutih lai tak chuan, thâwklehkhatah Japan ral alo liân ta thut a! Tûn thlenga mite mak tih alo hlawh ta anih hi!

            Ringtu duhtak, tûnlai khawvêl thil awmzia hi han thlîr ila, khatih hunlaia Allied Forces ho ang kha kan ni e, i fîmkhur ang u. Kan thla a muang a, kan inthlahdah a, he khawvêlah hian picnic tûra kal niâwm fahranin nuâm kan tâwl ta. Computer leh Electronics finna ten khawvêl A AW B ah min hruâilût a, țhian rual awmkhâwm leh chhungkaw țhukhâwm pawh inkâwm hman lêk lovin mahni Mobile Phone țheuh kan bih ngar ngar anih tâk hi. Chhungkaw values a awm tawh lova, Pathian thuin hmun a chang tlem tial tial ani. Khawvêl thila kan buâi a ta laiah kan fate pawh Pathian thuah kan kâihruai hman tawh lova.

            Țumkhat chu kan laina hnâivâi tak drugs OD a thi kan vui pek alâwm; ka chhungte an ni a, chuvangin an chhungkaw chanchin ka hre chiang a. Chhungkaw pangngai tak pawh an ni, khawvêl thlîrna dânah chuan. Mahse, Pathian țih chhungkua anga sawi chi erawh an ni lêmlo. Bawiha ti mai teh ang - vuinaah chuan chhungkaw aiawha thusawitu chuan, "..... bathroomah chuan alo tlu reng mai a, an va hmuh meuh chuan tih ngaihna alo awm tawh lova..." a tih lai mêkin, ka rilruah Lazara farnuin Isua hnênah, "Lalpa, hetah awm ni la chuan, ka nuța a thi lo tûr", atih kha alo lang fo mai a (Johana 11:32)

            Ni e Lalpa, he mite hnênah pawh hian awm ni la chuan, Bawiha a thi lo tûr!

            Lota hnênah a mikhualten, "Lalpan khua hi ati boral dâwn a ni" (Genesis 17: 14b). atih ang khan, Lalpan kan chênna khawvêl hi ala ti boral dâwn, Allied Forces te inrin loh lai taka Japanese ho an rawn che thut ang khian alo la thleng dâwn ani.

            Keini chhungkua kan him dâwn em, kan hnênah Lalpa a awm reng em? Khawvêlah hian muang mai mai hman kan ni tawhlo tih i inhre thar leh ang u.

            Sodom khua atih boral dâwn tûka a mikhual Vântirhkohten Lota hnêna an sawi hi keini tan pawh a pawimawh takzet ani - 

 "I nunna tûrin tlân chhuâk rawh! I hnung lam hawi suh la, phaizawlah rêng rêng hian ding hek suh; tlangah sawn tlân rawh, chuti lo chuan i boral dah ang e," (Genesis 17:19) tih hi.

No comments:

Post a Comment