ARTICLE - ISU KRAWS MI HNAIHTÎR RAWH

ISU KRAWS MI HNAIHTÎR RAWH

            Hla phuahtute leh an chanchin hi ngaihnawm ka ti  țhîn. "Isu, Kraws mi hnaihtîr rawh" (Jesus keep me near the Cross) tih hla mawi tak leh a thu pawh țha êm êm mai phuahtu Fanny Crosby tia kan hriât pawh hi a ngaihsân awm hle mai. A hmingpum chu Frances Jane Crosby ani a, March ni 24, 1820 ah New York ațanga kilometer 80 vêla hla, Brewster khuaah alo piang a. A vanduai êm êm na chu, a piân ațanga chawlhkar ruk leka upa anihin, a mitna ah damdawi diklo an hnawih avangin a mit an tih delsak a.  Chu mai chu ni lovin, thla ruk mi lek anihin a pa John Crosby chuan a thihsan a; a nu leh a pi in an enkawl seilian a. Khawvêl êng hmuthei lo mahse, Pathianin talent țhatak mai a pe thung a. Hla mawi tak tak a phuah țeuh ani. A hla phuahte zîng ami, mite rilru hneh êm êm țhîn, "Isu, Kraws mi hnaihtîr rawh" tih hi sumdawng mi pakhat William Doane-an hla thlûk ringawt a siam ațangin a thu hi Fanny chuan a phuah ani, an ti. A hla chang hmasa ber chauh pawh hian thu tamtak a sawi ani:

  "Isu, Kraws mi hnaihtîr rawh,

  Tuikhur hlu awmna kha;

   Damna tui mitin chhuahna,

   Kalvari-a luang kha."

            Kraws ațang chuan sual vânga hliamte thâwi damna atan Lal Isua thisen chu mi zawng zawng tan, a thlâwnin, a luang chhuâk a. Chuvangin, Kraws hmun chu lei ânchhia zawng zawng leh vân malsâwmna inthlâkthlengna hmun ani a, chatuan boralna aiah chatuan nunna kan thlâkthlengna hmun ani a, lei hringnun kan pelh hnua Vânram nuam min thlentîrtu kâilâwn awmchhun ani. 

            Kan nitin nunah, Kraws hlata kan awm apiangin, khawvêl thilten kan rinna an ti chau fo țhîn a, kan petek leh țhîn ani. Bo hmang mihring kan ni si a. Hemi avang pawh hian, a Sapțawnga  "Jesus keep me near the Cross atih ah hian,  "Kraws mi hnaihtîr rawh,"  tih mai hi ka duhtâwk lo fova, "Kraws bulah min dah reng rawh" tihin a chiang lehzuâlin ka hria ani. "Ka tan erawh zawng, Lalpa hnaih hi a țha ani," tih leh "Nitin ama Kraws puin mi zui rawh se," tih ang khân. 

            Hawh u, mitdel hlaphuah thiam Fanny Crosby ang hian, Isua Kraws bula awm hi thlâkhleh ngawih ngawih nachang i hre thar leh ang u.