ARTICLE - "IN TAN HMUN SIAMIN KA KAL DÂWN HI"

"IN TAN HMUN SIAMIN KA KAL DÂWN HI"

                          

"Ka Pa inah awmna tamtak a awm a, a awm loh chuan ka hrilh tawh tûr che u a ni, in tân hmun siamin ka kal dâwn hi. Tin, in tân hmun ka han siam chuan, ka lo kîr leh ang a; ka hnênah ka la ang che u; ka awmnaah nangni pawh in awm theih nân." (Johana 14:2-3).

            Hmân deuh tawh khan kan fanu hi Agartala ah lehkha zir tûrin kan zuk dah ve a. Hostelah a zuk awm a. A vawikhat awmhranna ani bawk a, kan ngai êm êm țhîn a. Term chawlh hmasa ber, alo haw theih hun tûr chu nghâkhlel takin kan thlîr țhîn ani.

            A lo haw hun tûr chu alo hnai ta, tihah chuan kan phûr êm êm mai a; a room chu kan lo tifâi sauh sauh a. A mutbu te, thosilen, chhuât leh bangrel zawng zawng kan tifâi a. Hostela awm chu an râwp țhîn, tiin eitûr tuihnai lo neihsak tûrte kan ngaihtuah ani. Mateii alo haw dâwn miauva.. theihtâwp chhuah takmeuhin kan inchhung leh pâwn chu kan thîân fai a, kan lo inbuâtsaih ve ani. Nuam thei ang berin awm se kan duh vâng ani.

            Chutah chuan, keini mahin heti taka kan fanu lo haw tûr atan kan lo inbuâtsaih a, nuâm thei ang bera a awmna tûr kan lo siâm chuan, Lal Isuan kum sanghnih chuâng takmeuh thanga kan tan a han bûatsaih chu ava nuam dâwn êm, ngaihrût thiâm chi pawh ani lo, tiin ka ngaihtuah reuh reuh a...

            Kan tân hmun a siam zawh hunah chuan, a lo kîr leh ang a, a hnênah min la ang a, a hnênah keini pawh kan awm ve theih nân!