SERMON - I NAU PÂI KHA LALPA TA ANI ASIN!

I NAU PÂI KHA LALPA TA ANI ASIN!

     "Ka riruang la famkim lo chu

     i mitin a hmu a,

     I lehkhabuah chuan

     Ka pêngte zawng zawng hi

     ziak vek ani a" (Sam 139:16).

Christmas Sermon thupui, Heroda Chibai Bûkna tih kha rilruin ngaihtuah lêt leh lawk ila. Nausên suât hun, kan tih kha alo thleng dâwn mêk e! Ka thu ziâk mâwlmang têtê min lo chhiârsak țhîn tute u, min tlangâu pui ve rawh u! Suâl râpthlâk tak laka kan ram kan him theihnan a pawimawh êm ani: Nu pum chhunga nausên insiam mêk, riruang la famkim lo (foetus) hi Lalpan a hmu a, ziak meuhin a chhinchhiah vek asin!

               Lalpan tih tlâk a phallo!

Pathianin mi tupawh mai hi he khawvêla min tirh chhante kan tih zawh hun huna ama hnêna kîr leh tûra a siâm kan ni a; khawvêl êng kan hmuh hma hauh ata tawhin a rawng bâwl tûra ruâtsa kan ni; chu chu Bible ah chiang takin min hrilh. Heti hian ati-

   "Pum chhunga ka siam hma chein

   Ka hre tawh chia,

   Chhûl ata i chhuah hma pawhin

   Ka serh hrang che a,

   Hnamte hnêna zâwlneiah

   Ka ruât tawh a che"(Jeremia 1:5)

Chuvangin nausên la pianglo tihnat palh thuah pawh a lâwm lo hle tih kan hriât theihna chu  Exodus 21:22 ah heti hian kan hmu ani, "Tin, mi lo insual ta sela, hmeichhe nau pai vaw palh sela, a nau pai chu lo tla sela, chhiatna dang erawh chu awm lo sela, chu hmeichhe pasalin a ngen zât chu châwitîr ngei tûr ani". 

            Chu mai ani hleinêm, hmeichhe nau pai vaw palh sela, chumi avangin a nau pâi chu lo thi hiâl phei sela chuan, "Amaherawh chu, chhiatna dang (thihna emaw ruâl banloh phahna) lo awm sela chuan nun aia nun,..." (Exodus 21:23). A awmzia chu, a titu chu tihhlum ve hiâl pawh a phal ani! Nausên la piang lo chungah Pathian thîkthu a chhe hlê tih kan hre thei âwm e.

            Sermon dangah ('Taitea Tel Lovin' tih kha), khawvêla kan awm chhunga Pathian malsâwmna kan dawnte zîngah kan fate hi an hlu ber, tih kan sawi tawh a, Sam ziaktu chuan,

   "Ngai teh,

    fanaute hi Lalpa laka kan

    ro chan an ni a,

    Rila rah hi a lâwmman min

    pêk ani"  ati hiâl ani (Sam 127:3).

Kumtîr lam, kumthar chawhma lama arûka  Private Clinic ahte kal a, Heroda Chibai Bûkna - nausên suât rûnpui - lo thleng fo țhîn kha, tûn hnuah, kumin ațang hi chuan i sim teh ang u; chutichuan, Lalpa lung a âwi êm êm dâwn si a.

            Kan lo tisual palh tawh anih pawhin, mihring laka muâlpho hlau lovin Lalpa hnênah tlu lût ila, "Tu pawh ka hnêna lo kal chu ka hnar tawp lovang," titu chuan kan chêt suâlna ngei pawh hmanruaa hmangin, min lo ngaidamin, Setana tih muâlpho nan a hmang hlauh thei ania. Mihring laka mualpho ai chuan Pathian thinurna chu a nasa zâwk si a. Esauva leh Jakoba te unau sawina, Tirhkoh Paulan Rom mite hnêna a sawi ang hian, i nautê pawh kha Lalpan a duh ani,  "nautê chu an la piân hma, chhia leh țha an la tih hmain, thiltih vang ni lovin, a kotu duh vâng ni zâwkin, thlan lam thuah Pathian thuruât chu a ngheh theih nan."

            Chutichuan, naute tihlum lova i hum tâk, i fa ngei chuan, Jeremia 20:17 a kan hmuh ang hian, 

   "Chhûl chhunga mi tihhlum loh

    avâng khân,

    Chuti ni se, ka nu chu ka thlân

    a ni mai tûr a." a la rawn ti ang. 

I chhûl chhunga nausên tan khan, nangma taksa  kha thlânah chantîr lo hrâm rawh aw!