SERMON - NANG MALSÂWMNA NI ANG CHE

NANG MALSÂWMNA NI ANG CHE

             "I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh. Tichuan, chi ropui takah ka siam ang chia; mal pawh ka sâwm ang chia, i hming ka ti ropui bawk ang; tin, nang malsâwmna ni ang che." (Genesis 12: 1-2)

            Helai Bible chang hi Pathianin Abrahama hnênah luangchhuak tûra a hrilhna ani a "I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh." ati phawt a, a awmzia chu luangchhuak tûra tihna ani a. "Tichuan, chi ropui takah ka siam ang chia; mal pawh ka sâwm ang chia, i hming ka ti ropui bawk ang; tin, nang malsâwmna ni ang che." ati leh a. Chang 1na leh chang 2na ang khian  țhen hnihah a țhen theih a:

   "Luangchhuak la," tih leh

   "Malsâwmna ni ang che", tiin.

            Ram thianghlim, Israel ramah khuan dîl lian deuh deuh pahnih chauh an awm a, chu chu Galilee leh Tuipui thi an ni. Mite tana kan va luânchhuah hian midangte tan mai ni lovin, mahni tan pawh malsâwmna ani tih chiang êm êmin an entîr ani:

            Galilee dîl ah chuan sangha chi hrang hrang chi 27 lai an awm a, khawvêl hmun danga awm ve rêng rêng lo, sangha ei nuam deuh mai, St. Peter's fish an tihte a tam mai a. Galilee dîl kam vêlah chuan hnim hring hmun nuam tak takte an awm a; nungchate tual lênna ani. Mihring chênna khaw tamtakin a hual vêl bawk a. Lal Isua thil mak tihna hmunte pawh kha a tam ber chu Galilee chhehvêlah ani a, Lal Isua ngei pawh khan Galilee leh a chhehvêl hi nuam ati ni ngei tûr ani.

            Galilee ațang chuan Jordan lui a luangchhuak a, Tuipui thi, Dead Sea ah a luang lût a, Tuipui thi ațang chuan eng lui mah a luangchhuak lova. Chutichuan, Tuipui thi chu a hming ang ngeiin, a chhung leh a chhehvêl a khawro êm êm mai a, nungcha rêng rêng hmuhtûr a awmlo! Ka kal ve țumin, hnaitêah bus in kan tlânpêl a, mak deuh maiin mi râp deuh tlat anih chu! A nêlawm fahran lo. A tui pawh a bâl a, a al tûk mai, an ti. 

            Thil mak êm êm mai chu, Jordan luiin a luân fin ve ve ni si, Galilee chu nungcha tinrêngte tan hmun mawi leh nuam êm êm anih laiin, Tuipui thi erawh râpthlâk khawpin a khawro anih chu: Mak tak ani! Jordan luiin a châwm țheuh țheuh!

            A chhan chu hei hi ani: Galilee chu a luangchhuak a, chu chuan ati thianghlim a, nungcha tinrêngte tan malsâwmna alo ni ta a; khawvêl hmun tin ațangin englai pawhin tourist ruâlin an tlawh hut hut reng a. Tuipui thi erawh chu a inphal ve lova, Jordan lui ațanga tui thianghlim a dawn zawng zawng pawh pechhuak phal ve lovin a khuâp tlat a, alo rimchhia a, nungchate tan awmna tlâk lohah a insiam ta ani!

            Kan mihring puite tana inphal taka kan luânchhuah hian, mite tan malsâwmna kan lo ni ang a, Pathianin a tiam ang ngei khian mal min sâwm anga, kan hming pawh ati ropui dâwn alo ni.

  "Pe rawh u tichuan pêkin in awm ang.

   Pêkah Pathian in hnehbân thei

   lovang,

   Pathianin mihring lei a ba ngai lo;

   Malsâwmna hnar alo ni si!"