ARTICLE - I IN ȚAWNGȚAI SAK ȚHÎN ANG U

I IN ȚAWNGȚAI SAK ȚHÎN ANG U

Țawngțaina hian thil a tihei a, chhungkhat laina leh țhian țha te bâkah kan mi duhsak zawngte chu kan țawngțai sak țhîn a; Kristiante kan induhsakna sangber chu kan in țawngțai sakna hi ani. Kan in țawngțaipui hian, kan va dîlsak te mai ni lovin, an zar lo zo ve lehchhâwng te pawh an awm țhîn zuk nia! 

Indopui -II na hunlai khan Britain leh a thurualpui ramte, Allied Forces an tih ho chu Germany leh a thurualpui Nazis, Rome-Tokyo-Berlin nexus ho lakah thapui thawh takmeuhin beihpui an thlâk a. British Prime Minister Sir Winston Churchill chuan England ram mipa tawh phawt chu, ramțang rual an nih tawh chuan British Army ah a volunteer tîr țeuh țeuh mai a. Mipa râwlthar tê tê pawh an in enlist chur chur mai kha ani a. 

            Private Benjamin pawh chu Burma lama Japan ral do tûrin a inpe ve ta a. A awmna platoon chu Dakota thlawhna hmangin Asia khawmualpui khawilai berah emaw an drop dawn ta a. Private Bena nu chuan, a naute duatlai, chutia hriâtloh rama indona hmuna a kal tûr chu mittui luang zawih zawih chungin ava thlah a. Anu thu chah hnuhnung ber chu, "Tûktin zing dar 9:00 ah nangma pual liau liauvin ka lo țawngțai țhîn ang " tih hi ani.

            Burma ramah chuan indona chu a nasat vanglai ani a. Japan sipaiho lah an huaisen narawh a. Chhimthlang lam panin ram an rawn la duai duai mai a. 

            Tûk khat chu, zîng khua a vâr fel chauh tihin Japanese ho chuan Bena awmna Platoon Post chu an rawn bei chiam mai a. Bunker țhenkhat chhuahsana an inhnuhdawh a țûl ta! Bena awmna piah lawk bunker bulah chuan an țhianpa, Japanese ho kah hliâm chu insaseng ve thei lovin a vial a vial mai a; mahse, silaimu lêng vêl a nasat êm avangin tumahin engtin mah an pui theilo. Mahni tawmna hmun him ațangin an thlîr ringawt mai ani.

            An hotupa, an Sergeant senior chuan Private Benan a sana a melh leh țhîn chu ava hmu reng mai. Dar 9:00 a rîk velah chuan Bena chu bunker ațangin a tlanchhuak a, silaimu lêng vêl karah an țhianpa awmna chu a va pan a, a thlen veleh a rawn paw phei a, rang takin an Sergeant senior awmna bunker ah chuan a rawn zuânluh pui a, hmêlma silaimu pakhatmah den fuh lohvin a țhianpa nên chuan an him ta ani. An Sergeant senior chuan,

             "Ben, ngati nge dar 9: kher?"

            "Ka nuin tûktin dar 9:00 ah min țawngțai sak dawn tih min tiam a. Ka nu min țawngțai sak lai tak chuan engmahin min tihnat ka ring lova, dar 9:00 a rîk hun ka nghâk ani," ati!

            Bena nu țawngțaina chuan, Bena hnênah huaisenna a pe a, thiltihtheihna pawh a pe a; chumi zarah chuan an țhianpa, thih mai hmabâk pawh kha alo him ta ani!

            Kan ințawngțai sak ani, tihte hi inhrilh fo țhîn ila, an tan huaisenna leh thiltihtheihna, damna, thlamuânna a keng tel tlat ani.

            Bang lovin i ințawngțai sak țhîn ang u.