SERMON - SAVUN LEHKHA MAWLH KHA

SAVUN LEHKHA MAWLH KHA

                                                 

            Mi tupawh mai hi, hlauhna hmuna kan awmin Bible kan inchhawp a, kan thla a muang țhîn. Naupan laiin lukham bula Bible inchhawp kan chîng țhîn pawh kha, eng dang vang ani lo; min thlamûantu anih vang ani. Tirhkoh Paula hunlai khan tuna Holy Bible bu 66 awm hi an la remkhâwm lova, lehkha inzial, Scroll  ala ni a; savun lehkha ani. Tirkhoh Paula pawh hian a thil neih ve chhun, kawrfuâl leh lehkhabu dangte ai pawhin a savun lehkha chu a dah pawimawh ani. Timothea hnênah,

 "I lo kal hunah Traos khuaah Karpa

 hnêna kawrfual ka hnutchhiah kha,

 lehkhabute nên khan rawn keng la,

 savun lehkha mawlh kha rawn keng

 ang che." ati ani!(2 Timothea 4:13).

            Ganga Ram Hospitala nursing staff te khu 80% vêl chu South Indian an ni a. An zînga Christiante hriât hranna chu an Name Tag ațanin ani; an Christian name ațangin. Kei pawh, Christian ka ni, tih lantîr ka duh ve a, Holy Bible hi ka lukham bulah englai pawhin ka dah ve mai a, I.V. line (drip hrui) te leh thil dangte a hnawk  țhin avang erawh khan, ka chhiâr fo țhîn pawh a ni lo; Christian ka ni tih hria se, tih ka duh vâng ani ber a.

            Kan fapa Mama chu lehkha zirin hmun hla takah a awmhrang dâwn a, a Nuin, "A luggage ah Chawfûn ka dah sak," atih chu Bible hi alo nia! Thlarau lam chawfûn kha anu chuan alo ngai pawimawh ber a, ka lâwm takzet ani.

            April ni 19, 2000 kuma BNLF (Tuikuk hel) hovin Vanghmun khaw tlangval Lalnunfela, S/o. Hrangkunga an kidnap țum pawh khan, Rajiv Nagar piah, Ansuri BOP (BSF Camp) pelh lawkah midangte nêna an chuanna Sumo chu an lo ti ding phawt kha ani a: chutah, passanger te bungrua zawng zawng an check hmasa phawt a. Chutah chuan, Zomuantlang khua ami, Bru Christian nula pakhat, a hming ka hre tawh mai lo, chu a suitcase an han hawnsak ve a. A chung berah Holy Bible alo awm a, Bible an hmuh chuan, an chhuah zalên nghâl a! He nula hi alâwm, khami zana hel hovin Sumo an suâm thu leh Mizo tlangval pakhat an hruâi tel daih thu, New Kawnpui BOP (MAP Camp) hmuna rawn kal vang vanga min rawn hrilhtu pawh kha!

            Tirhkoh Paula pawh hian, tân in chhung ațang pawhin a savun lehkha mawlh kha a ngai pawimawh a, a thlâkhlelh ber ani; a Bible mawlh kha Timothean a rawn theihnghilh sak palh ang tih a hlau ani! "Savun lehkha mawlh kha rawn keng ang che"(2 Tim. 4:13b).

            A chunga mi ang khian, Ganga Ram Hospitalah khan Bible chu ka tan Christian ka nihna tilangtu, ka identity, ani a; Kan fapa Mama tan Chawfûn ani a; Zomuantlang khaw nula pakhat tan chuan April ni 19, 2000 khan a Sahimna, a mantute kut  ațanga a chhuah Zalenna  hmanrua ani. 

            I nunah Bible hian pawimawhna a nei ve tawh țhîn em le? 

            Bible hi Pathian lehkhabu ani a; Pathian nêna kan inpâwlna ani a, kan nun țheuhah  hmun pawimawh tak a luah țhîn ani. Nunna Bu ani. Chuvangin, i inchhunga i kawl kha duhtâwk mai lovin, i zinna ah, i kalna hmun apiangah i Savun Lehkha mawlh kha keng țhîn ang che.