ARTICLE - THI KHAWP HIÂLA HMANGAIHNA

THI KHAWP HIÂLA HMANGAIHNA

            Tûnțum chu tehkhin thu ka lâk hi a Hindu ruih mai dâwn a. Kan thil sawitum ti fiahtu anih ka beisei e.

            Rama Saran chu pavalai tak ala nih laiin, hun lo takin a thi ta mai a. A pizawn, a nupui leh a fapa naupang chuan a ruang chu an kîl a, an țap chiâm chiâm a. An țap bâng theilo ani ber a. Chuti teh thuta Rama Saran a thih thu chu a hriâtin, an khaw Puithiam Baba Swamiji pawh chu alo kal vat a. Rama Saran ruang kîltute chuan Baba Swamiji an hmuh chuan nasa lehzuâlin an țap ta a. A pizawn chuan, 

            "Baba, ka mâkpa hi lo tho leh se ka va ti êm! Engtin nge awm se min tih le, chhungkaw eizawngtu awmchhun ani a....!" ti chungin alo țah khum a.

            Rama Saran nupui pawh chuan țap hawm hawm chungin, "Baba, kan fapa lah ala tê si, kâitho leh rawh," alo ti bawk a.

            Puithiam chuan a theihtâwpin thlamuân a tum ngial țhîn, mahse a sâwt lo; Rama Saran chu a dâwithiâmna hmanga a kaihthawh leh an beisei tlat ani.

            A tâwpah chuan, Baba Swamiji chuan, "Aw le, tui no khat rawn la ula, ruang bulah hian han dah teh u," ati ta a. Tui no khat chu ruang bulah chuan an rawn dah ta a. Beisei tak chungin an thlîr ta țhap mai a. Baba Swamiji chuan, "Aw le, tûnah chuan mi pakhat, tuemaw berin tui hi in zo vek sela, Rama Saran hi alo nung leh ang. Mahse, tui intu zâwk chu a thi ve thung ang!" Chutah chuan le, pizawnin a fanu leh a tupa a en a, fanuin a nu leh a fapa a en a, fapain a pi leh a nu a en a! Țap thâwm zawng zawng a reh zova!

            Baba  Swamiji chuan, "Nang pi ber, i upa tawh thova, in mai ta che, eizawngtu awmchhun hi a thawh leh a ngai ani!"

            "Engtin nge kei chuan ka in tehlul ang! Ka fanu pakhat zâwkin min la mamawh lutuk, nau a hring țêp tawh lehnghâl a, an buâi tûr zia mai chu!"

             "Anih chuan nang, i pasal kâitho tûrin tui hi i in a ngai ta anih chu!"

             "Ehe! A theihloh. Ka fapa hi engtin nge a awm ang? Nu a mamawh alâwm!"

            "Anih loh leh, Bawiha, nang tui saw va in ta mai che!"

            Chu vêleh a nu chuan a fapa naupang tê chu a kuah bet tlat a, "Teuh lo mai! I â ta em ni? A la naupan êm hi. A nun a ințan dâwn chauha, a thih a rem lovang, hmsbâk a la ngah lutuk!"

            Chutah Baba Swamiji  chuan, "In vâi hian pawimawhna in nei țheuh vek mai a, thi hman pawh in awmlo anih hi. A thi âwm ber Rama Saran a thi hi a fuh ani; a rimchhiât hmain i va hâl ang u!" ati ta a.

            Ani, he thawnthu hmang hian, mihring hmangaihna chuan damchhung chauh a daih a; in thihsak khawpa hmangaihna a awm lo, tih kan sawi tumna ani.

            Kan Lal Isua min hmangaihna erawh chu mihringte inhmangaihna aia thûk zâwk. in thihsak hiâl khawp hmangaihna ani! 

            "Krista hmangaihna chuan min tîr lui a ni; heti hian kan ngaihtuah: mi zawng zawng thih aiin mi pakhat a thi a; chuvângin mi zawng zawng chu an thi a ni." (2 kor 5:14).

     Lalpa chu fakin awm rawh se!