SERMON - "I DUH CHUAN MI TI THIANGHLIM THEI E"

"I DUH CHUAN MI TI THIANGHLIM THEI E"

            Mihringte hi he khawvêla kan awmchhung hian, natnate vei thei tûra sîam kan ni a; englai mai pawha hrisêl êm êm reng tûra duân kan ni lova, natnate hi khawvêlin a ken tel ve an ni. Mahse, kan natnate hi Pathianin hmanrua atan erawh a hmang fo țhîn tih hi chu keimah ah pawh hian a chiang êm êm a. Amah min hnaihtîrtu an ni!

            Pathian chu kan natna tidamtu atan kan duh țheuh a. Tihdam țawngțai  rawngbâwlna keng chunga Pathian rawngbâwl tute kan pan nasa a; englai pawhin Țawngțai Damthei kan pan hut hut reng a, chu chu ka sawisêl ani lo. Mahse, kan natna lak ata damna kan duh a, tih thianghlim kan duh em? Han ngaihtuah vang vang teh....

            Kan sciatica, kan taksaa cancer natna, kan pumpui țhalo, kan ruhseh, kan beng țhalo, kan mitdel, kan kawțhalo tihte chu tihdam atân kan duh a. Mahse, kan bawlhhlawhna dangte hi chu lâk bo kan phal hrih lo fo țhîn em? Eirûk natna, itsîkna natna, hurna natnate leh khâkna zawng zawngte hi tihdam tel vek atan chuan kan la ui țhîn em? Natna pakhat bîk chauh ni lova, a vaia tih thianghlim law law atan kan inhlân ngai em aw?

            Marka ziaka phâr pakhat, a hming pawh sawi lan loh, Isua rawn pantuin damna a dîl dan leh Isua chhânna hi ropui ka ti! Marka 1:40 kan en chuan, tihian a inziâk a, 'Tin, a hnênah phâr alo kal a, "I duh chuan mi ti thianghlim thei e," tiin a hmaah țhingțhiin a ngên chiam a.' 

            He mi hian Isua hnênah, "I duh chuan ka phâr natna hi i ti dam thei e," tih mai âwm tak ani a, mahse "Mi ti thianghlim thei e," ati daih zuk nia! A zavaia tih thianghlim a duh ani! Ava ropui êm! 

            Chhiar zêl ila, Isua thinlung pawh a hneh ngang ani, tih a hriât a. "Aw le, lo thianghlim tawh ang che" ati satliah mai lova, 

  'Tin, ani chuan a lo khawngaih

   êm êm a. a han ban a, a dek a,

  "Ka duh e, lo thianghlim tawh ang

   che," a ti a.' (Marka 2: 41).

            He mi, phâr pakhat lo kal hian, a phâr natna mai tihdam a dîl lova, a bawlhhlawhna zawng zawng nên tih thianghlim a duh a. Chu chuan Isua thinlung a hneh hlê a, a lama bân phar meuhvin a han ban a, a dek ta kher ani!

            Lal Isua chu kan natnate nên kan pan ang: Mahse, chu kan taksaa natna pahnih - khat damna chauh mai chu dîl tûr ni lovin, kan zawng zawnga  min ti thianghlim tûrin i pan țhîn ang u. Ani chuan min lo khawngaih êm êm anga, kan lama ban phar meuhin min lo dek anga, kan natnate tidam chungin min lo ti thianghlim dâwn ani.

  "I duh chuan mi ti thianghlim thei e."

  "Ka duh e, lo thianghlim tawh ang che."