SERMON - MI LIÂN PUI PUI AN LOKAL ANG A

MI LIÂN PUI PUI AN LOKAL ANG A

  "Min beih theiha min tihhlum

   chuan, in chhiahhlawhah kan awm

   ang a, amaherawh chu keiin ka

   ngam a, ka tihhlum chuan kan  

   chhiahhlawhah in awm ang a, kan

   rawng in bâwl ang"(1 Samuela 17:9)

            Philistia mite chuan indo tûrin an sipaite an khâwm chiam mai a. Saula leh Israel sipaite pawh chu anni lo dang tûrin an pungkhâwm a. Philistia ho zîng ațang chuan mi liânpui, chak lutuk mai, a hming Goliatha, tawng ruk leh khâpa sang, ralthuâm famkim nêna inbel chu alo dingchhuak a; Nitin maiin Israel ho chu a rawn cho țhîn a ... Saula leh Israel ho chu an zâm a, an hlau ta êm êm a (1 Samuela 17:11).

            Keini pawh hian kan nitin nunah Goliatha ang miliân, țihbâiawm tak takten min cho fo țhîn; min hneh chuan an chhiahhlawhah kan awm ang a, kan hneha, kan tihhlum erawh chuan kan rawng an bâwl ang. Kum lama la naupang deuhte leh țhalaite tan chuan kan nitin nuna min cho țhîn tu miliân chu zu châkna miliân te, drugs tih châkna miliân te, inneihna pawn lama hurna miliân te, miliân chi hrang hrangte an awm a; sorkar hnathawk tan chuan eirûk châkna miliân te, thatchhiâtna miliân te an awm bawk ang. Keima mimal nunah chuan zu hi chu miliân ani tawh lova, ka thihpui țêp tawh avangin ka sim tawh a, nula hmêlțhate pawh keimah hi ka chhîat tawh êm avang pawh ani ang e, miliân ni tham tûrin tumahin min tibuai duh tawh lo; mahse ka official position emaw, kan chhungkaw harsat avanga kut tling lova thil tih ve mai châkna hi a liân ve țhîn khawp mai! Chutiang zêlin, kan nitin hna leh kan chhungkaw dinhmun azir te pawhin kan miliân te an inang țhup țhup lo thei; harsat luat avanga rûk mai châkna miliân, fa sual phurrit min siâmtu milian, uirê châkna miliân, miliân tamtak an awm, ringtu nunah.

            Heng kan nitin nuna min cho țhîntu miliânte hi an țihbâiawm a. Kan hneh zêl loh chuan an chhiahhlawhah kan awm ang a, taksa leh thlarau thihna min thlen ang!

            Mahni chakna leh theihna hmanga hneh theihloh an ni; Saula leh Israel sipai ruâlte pawh an zâm a, an hlau ta êm êm ang khan, kan rilru chhungril takah hlauhnain kan khat țhîn ang; sual zêprûk neite nun chu a zalên thei tlat lo alâwm!

            Davida chuan, Saula ralthuâm a inbel chhina, ani tan chuan a rit lutuk, a kalpui hleithei lo, "Ka la tichhin ngai lo" ati thlâwt ani! Pathian chakna ringin, naupang infiâmna hmanrua - virvawm mai mai hmangin a hneh hlauh thung! Heta Davida țawngkam hi ka chhiar ning theilo:

            "Sakeibaknei kutbâwr ata leh savawm kutbâwr ata mi chhanchhuâk tu LALPA chuan chu Philista mi kut ata chu mi chhanchhuâk ang"! (1 Samuela 17:37).

            Virvawm lung chu Goliatha 'chaldar takah a han vawm a, a chalah chuan lung chu a lût a, a tlu bawkkhup ta dêr mai a' tih kan hmu ani!

            Kan nitin nuna min rawn cho țhîn tu miliân kan tihte khi, Saula ralthuam hmanga beih vak vak chi an ni lo. Khawvêl thiltihtheihna hmanga hneh chi pawh an ni lo. 1990 kuma Serkawn daia jeep accident a boral ta BCM Pastor Rev. Hrângêna  khan hla mawi deuh mai min hnutchhiah a, hetiangin-

  Țhenkhatten tawlailîrte ringin,

  Ralthuâm famkim ring mahsela;

  Kei erawh chuan Lalpa hming ka  ring a,

  Nungin ka tho, Hnehtu Lal zârah."

            Chhiartu duhtak, i nunah miliân pui pui an lo kal ang a, i chakna ring lovin Lalpa chakna lo ring zêl ang che. Indona chu Lalpa indona ani si a (1Samuela 17:47).