ARTICLE - LUNGÂWINA KAN ZAWNG ȚHÎN

LUNGÂWINA KAN ZAWNG ȚHÎN

   

AD 1500 vêl khan khavêl pum dêngchhuak khawpin Fountain of Youth kha a lâr êm êm mai a. Mizoten Fiara tui kan hriât ang deuh hian, tui thuhrûk anj a, chu tui chu a in apiang an țhatlai reng na (tar lohna) niin an sawi ani. Spanish pa hausa Juan Ponce De Leon pawhin chu tui chu zawngin America khawmualpuiah a neih zawng zawng a sêng ral a, chumi pah chuan Florida khawpui pawh khu a din vêl ta mai mai niâwm tak ani. 

            Tûnlai hunah pawh hian chu Fountain of Youth chu mihringin ala zawng zêl a. Kan zawn ber pakhat chu KȚP kum Over lohna hi ala ni! Calendar in kan kum diktak min hriâttir țhîn mahse, Darthlalanga kan in hmuh dân chu awih nuâm kan ti zâwk zêl ani!

            Kan nulaten make up chi tinrêng an inhnawih a, blusher nên, khuavang siâmchawp thlengin - chawhma lamah khuavang dum, tlai lamah a uk! Sam kir saa piangin an ti ngîl a, sam ngîl saa piang lahin an herh kir leh si a! A hâng an in ti ngo a, a ngo lahin Suntan lotion hmangin an in ti thim deuh a.

            Hmeichhe hovin pheikhawk thar an han bun chhin a; darthlalang bulah an va kal hnâi tê tê a, an hmai an en daih țhîn pawh hi thil mak tak chu ani!

            Keini hunlaia mahni lu len hrechang lo lêk a Bruce Lee hairstyle kan uar lai te kha! Tûnlai râwltharte style erawh chu a Korean lam ani tawh a. Chu lovah chuan, Basketball hian tlangval ho sam a suât nasa ve bawk a. Kan lungawi ve êm êm a; Mahse, kan lungawina chu a inthlâk danglam reng mai a, nun tuihâl a reh thei mawlh lo! Lungâwina Famkim chu khawiah nge kan zawn hmuh tâk ang le? 

            Johana 4:14 ah chuan, Lal Isua chuan, "Tupawh an hnena ka pêk tûr tui in apiang erawh chu kumkhuain an tuihâl lo vang " ati a. 

            Kan nuna Lal Isua kan neih hi lungâwina chu alo ni!

            Lal Isua neitu chu a thinlungah lâwmna maktak mai a awm a; a mâwina pawh maskara, blusher, tihvêl a ni ve lo. Kei chu, nula makeup uâr deuh ai chuan , hmêl hlim sâng, simple deuh hi hmuh nuam ka la ti reng fo. A hmėlțhatna kha chhungril lam ațangin ani tlat.

            Thinlung a lâwm chuan hmêl a hlim lo thei lo ani. Bible chuan,

       "Thinlung hlim hi damdawi

         țha tak a ni." ati (Thuf.17:22).

            Lal Isua nungchang, make up țha ber țâwmpuina nun hi a ni, tuihâl tawh lohna tui a pêk tûr a sawi chu ni. 

Mi tu pawh, khawvėl hlimna reilotê têin a tih buâi ve loh, pâwnlam aia chhungril lam mâwina dah pawimawh zâwk tu chu, Pathian thilsiam zawng zawngte a hmuhin a lâwm a, zîng nichhuak, thing leh mau, ngaw dur khup te; luite luang dem dem leh phengphehlep thlâwk te; vân boruak zau tak leh arsi pe tuar te hi an lo mawi êm êm mai a. Amah ngei pawh darthlalanga a inhmuhin, chei chiâm chiâm ngai lovin a mawina a inhmu țhîn a, chu chu tirhkoh Paula pawhin Timothea hnênah heti hian a sawi ani:

            "Pathian thilsiam tinrêng hi a țha si a, lâwmthu hrila pawm anih tawh phawt chuan eng mah duh loh tûr a ni lo;"(1Timothea 4:4).

            Mihring chu alo lang upa tial tial a, a hmelah pawh puitlin riauna, thlamuânpui awmna, zahawmna te alo langchhuâk a, hei leh chen a dam vânga lâwmna nên, a hmêl lo zûr ta te pawh lâwmthu hrilin a pawm țhîn ani. Chu chu ani, lungâwina kan zawn fo țhin chu. "Chawimawi la, anin a chawi sâng ang che; I lawm chuan zahawmah a siam ang che."(Thuf.4:8)

 "Eng hi nge lungâwina ni ta ang le?

  Kei, ka lungâwina chu, Lal Isua chauh a ni;

  Lungâwina famkim ka hmuthei si lo.

  Lal Isua chauh hi lungâwina ani."