VAWIKHAT
PIÂNTHAR A TÂWK E
Kristian
țhalai tamtakte zingah, piangthar inti, in ringhlel leh si emaw, kan piantharna
hmasa duhtâwk leh lo kan awm fova; Camping ahte vawi engemaw zat kan luh nawn
pawha chiang chuanglo kan awm nawk bawk țhîn. A țhen lah chu, tute emaw hlim êm
êm kan hmuhin, chutiang kher chu ni ve vek tûra inngaiin, kan buai bawk țhîn!
Bible
hian eng ang taka Piangthar tûrin nge min tih le? Johana 3:16 ah chuan,
Pathianin khawvêl a hmangaih êm avanga a Fapa mal neihchhun min pêk thu kan hmu
a. Kan rin ber amah Lal Isua ngeiin a sawi ani.
Amah chu tupawh a ring apiang chu - Piangthar an lo ni ta a- chatuana
nunna chu an lo nei thei ta ani. Chu mai tê chu ani! Paula leh Sila pawh khan
tang vêngtu zawhna kha hetiang bâk hian an chhang chuang lo! Tirhkohte Thiltih
16:31 ah chuan, "Lalpa Isua ring la; tichuan, chhandamin i awm ang, nang
leh i chhûngte nên," an ti chauh mai ani!
Mi
tupawh alo piantharin hriâtpuitu pathum an awm ngei ngei a, a hmasa berah chuan
Pathian leh Setana an ni. Pathian chuan ama lama inlamlêtte thinlung a hmutlang
vek ang bawkin, Setana pawhin a thuneihna hnuai ațangin mi pakhat a chhuak leh
ta, tih a hre țhîn a; hretu pakhat leh chu amah mihring kha ani.
Hetah
tak hian kan uluk a pawimawh ta êm êm a. Mite hlimna leh danglam huihna ang
chan ve kan châkna te, țangkai taka Rawngbâwlna lama inhman nghâl mai duhnate
alo piang a, kan tlin nghâl zung zung lohin mahniah in rinhlelhna emaw,
beidawnna alo lût vat a, "Engmah ka ang ve theilo, chhâwng hnihnaah ka lût
leh teh ang," kan ti leh țhîn a!
Kan
hriat atana ka duh êm êm chu, Pathian hian Rawngbâlna aiin amah nêna Inpâwlna
hi a dah pawimawh hmasa zawk ani, tih hi ani. Eden huana Pathianin mihring a
siâm chhan ber pawh kha amah nêna inpâwl tûrin, ani tlat alâwm. Tichuan,
Pathian nêna inpâwlna ațang zêl zâwkin hlimna te, thu sawitheihna te, thilmak
tih theihna te thlengin a chawp zêlin, țûl atih ang zêlin, min pe dawn alo
ni. "I hun ti thiânghlim la, Lalpa
pâwl fo rawh" chuti chuan, Ama malsawmna (hlim taka lâm theihna te, thu
sawi theihna te, sual do theihna chakna te, thlarau thilpêk i awh zawng zawng
te) chu i lo chan theih nan, tiin kan zai țhîn ani lawm ni?
A
tâwpna atan Paula testimony hi en ila;
Pathianin, Paula hnênah piangtharte awmdan tûr a sawi hi "..chutichuan,
thim chu êng lamah an hawisan ang a, Setena thuneihna chu Pathian lamah an
hawisan ang, sual ngaihhnathiamna an hmuh nan leh, min rin avânga thianghlim
tawhte zînga ro chan an neih nân," ati a. (Tirhkohte 26:28)
Pathianin
a hmangaih êm êm che a, a Fapa mal neihchhun Isua chu i thih ai thi tûrin Kraws
ah a rawn tîr a, a thi ngei bawk a, a thawhlehna ah pawh i tho leh a, a
chhandam ta che ani; Chumi avang chuan,
thim chu êng lamah i hawisan ang a, Setena thuneihna chu Pathian lamah i
hawisan ang, sual ngaihhnathiamna ilo hmuh nan leh, Pathian i rin avânga thianghlim tawhte zînga ro chan i
neih nân, vawikhat piantharna kha a tâwk e.
No comments:
Post a Comment