ARTICLE - A KHALHTU SAW KA PA ANIA

A KHALHTU SAW KA PA ANIA

            Zin mite chuan, thlawhna hi chuân țhan a awmlo, te an ti țhîn a, khawchhe hnuaia thlawhna chuan phei chu a nuamlo duh khawp rêng ani. 

  

            Țumkhat chu thlawhna pakhat hi thli nasa takin a nuai a, chhûm a sut apiangin chu thlawhna chu a in sêp dawrh dawrh țhîn a. Lei lama tla thla duâi ang tein a awm țhîn a. A kilhna zawng zawng pawh chu a inphelh darh dawn ta emaw tih khawpin thlawhna bang pawh chu a ri ta țuâm țuâm  mai a. 

 

            Hetianga thlipuiin thlawhna a nuai tawhte hi an chesuâl fo rêng a. Chuvangin, chu thlawhnaa chuangte chu an chîai nasa ta mai ani. A țhen an țap a, a țhen an țawngțai a. Chutia an hlauhthâwn êm êm lai chuan, naupang tê pakhat erawh chu hlau hmêl reng reng pu lovin, nuam ti zâwk niâwm deuh hian a awm a. A țhut hmuna zâm hmêl pu miah lova a țhu chu mak ti deuh chungin a bula nu pakhat chuan a zâwt ta a,

            "Mama, mi zawng zawng thlabarin kan awm a, nang chu i awm hlê hlê thei bîk a. Kan thlawhna hi chesual ta se, kan vai hian kan thi vek dawn asin! I hlau ve lo em ni?" ati a.

             "Hlau love. Thlawhna khalhtu saw ka Pa ania!" tiin naupang chuan alo chhang awlsam êt mai a.

            Fapa naupang chuan a chuan mêk na thlawhna khalhtu chu a pa ani tih a hria a, a ring tâwk bawk a; eng anga thlipui nasa pawhin an thlawhna chu nuai mahse a pa thil tihtheihna ah a innghat ngam a, a thla a muang êm êm ani!

            Galilee dîl chunga thlipui nasa tak a tleh lai pawha tui taka muhil thei Lal Isua chu kan nun khalhtu a anih phawt chuan, enge hlauh tûr kan neih le? Kan hmalam hun zawng zawng a hre vek a, Amah chu a rin ngam a; kan nuna buaina thlipui anga min nuai țhîntu te chu a hau reh dawn lovem ni?

            Mi țhenkhat, manganna kan neih apianga "Thih mai ka duh" ti țhîn kan awm. Khawvêlin a ken tel, kan harsatnate hi thihsan vanga kiang ringawt chi an nilo. Isua nei lova thih ngawt phei chu hrehawm pakhat ațanga hrehawm lehzuâl bantlangna mai ani. Harsatna namên lo kan tâwk thei a, nun pawh a beidawng rum rum thei ani; mahse he kan chênna khawvêl khalhtu hi Kan Pa ani, tih i hre fo ang u.

            Khawvêla kan awmchhung hian, thuthang râpthlâk tak tak te, harsatna lian tham tak takte leh beidawnna nasa tak ten kan nun min vawrh lâwp lâwp a, min sêp vak vak a, kan chau țhîn; Mahse, i chîaî lovang u, naupangtê ang khian, "A khalhtu Ka Pa ania" ti zêl ngam ang u. Sam ziaktu chuan,

  "A ni, thihna lui kawr ruam zawh

   mah ila,

   Thil țha lo rêng rêng ka hlau lovang

   Nang ka hnenah i awm si a" ati ani.

   (Sam 23:4a)

Zâm suh, I chuanna khawvêl khalhtu hi i pa ani e