Article - "KA AWM ANGIN KA LO KAL ANG"

"KA AWM ANGIN KA LO KAL ANG"

   "Ka awm angin ka lo kal ang,

   I thisen hlu ka tân a luang;

   Tin, Nangin min sâwm avângin,

   Ka Tlantu, ka lo kal.

            Hla phuah thiam hmingthang tak, Charlotte Elliott kha kum 46 mi a nih in pa pakhatin Kristian a nih leh nih loh a zâwt a. Mûmal taka chhân ngaihna a hriât loh tâkah chuan, chu pa chuan a kalsan ta mai a. Mahse, chu pa zawhna chuan Charlotte-i rilru a luah ta tlat mai a, chu pa chu a va pan leh ngat a. Ani chuan, "I awm ang ang khan lo kal mai rawh" (Come just as you are), tiin alo chhang awlsam êt a. Chu thu tâwitê chu Charlotte-i tan chuan ava thui si êm! A awm ang angin Lal Isua hmênah a in hlân ta a, hê a testimony hla hi a phuah ta a ni!

   Țhalai duhtak, nang pawhin "I awm

    angin" Lal Isua i pan dâwn em le?

            I hun kal tawh ah, mi nupui/pasal i uirê sak tawh em, nau i ti tlain tual thattu i nih i inhre ru khiau em, rûk ru leh suâmhmang i lo ni tawh țhîn em, i dinhmun sang tak ațang khan i hnuaia mite chanvo i eirûk sak tawh țhîn em? Sual zêprûk nangmah chauhin i hriat - nangmah ti nuam lo fo țhîntu i nei em le? Nge, tûnah pawh khan drugs addict emaw zu ngawl vei mêk i ni em? Kan Pathian thu chuan,

“Lalpa, nangin khawlohna  te i chhinchhiah chuan,

Aw Lalpa, tu nge ding ang le?

Nimahsela, i hnênah ngaihdamna a awm a ni...”  tiin Sam 130:3 ah chuan min hrilh a. Amah Lal Isua țawngkam ngei, "Tupawh ka hnêna lo kal chu ka hnar tawp lovang," tih hi nangmah leh keima tân a ni asin! A ropui a ni!

            Kan sualte chhinchhiah lova, ngaidam țhîn tu Lal Isua chuan, "Ka hnar tawp lovang" a ti a che. In buatsaih lâwk chiâm a ngai lo. Tûnah khan, i awm angin Lal Isua pan ve rawh le!

  "Ka awm angin Nangin min lâwm,

  Min ngaidam, min tithianghlim ang;

  I thutiam ka rin avângin,

  Ka Tlantu, ka lo kal."

  

     Lalpan malsâwm che rawh se.