Article - THOLEH TAKSA ȚÂWMPUITU

THOLEH TAKSA ȚÂWMPUITU

            Ka nupui duhtak, Vanlalhmangaihzuali chuan December 14, 2007 khan nat lâwk pawh nei lovin min boralsan thut mai a. Kan fa tê ber lah chu thil hre mumal rual a la ni lova, "Khawnge anu?" tih a chîng lehnghâl a. A hrilhhai thlâkin lungchhiât a ti zual țhîn! Kei pawhin ka ngaih țhin tûr zia chu in ngaihtuah thiâm maiin ka ring. Upain, 'Nupa țang țhen chu dâr lehlam sahthlâk ang a ni,' an tih chu nêp tak a ni - khing hnih sahthlâk pawhin a hen pha lo.

            Mumang lamah tal hmuh châkin ka bei chiâm țhîn a, muthmunahte thlalâk hlui ka en nasa țhîn; mahse, a beidawnthlâk duh khawp mai! Țumkhat erawh chu, ka mumangah ka hmu ta hlauh mai a; ka bulah hian a lo mu a, "I eng kha nge na a, khati thuta i thih tâk mai?" ka ti a. Ngawi rengin a âwm zâwnah a kut a dah a (lungphu châwla thi thut kha a ni a). Chutia mahni nupui nêna intawng ta chu, mumang lam mah ni se, nupa kara kan lo awm țhin ang bawka awmpui tumin ka lo va kuah a; chutah, ani chuan, "Ka taksa hi a thianghlim tawh asin!" a lo ti a.  A lo ni dâwn tak e; thihna lui piah lama kan thawh leh hunah chuan, kan bawlhhlawhnate chuan min ûmzui tawh dâwn lova, vân nun thianghlimin kan leng tawh dâwn a ni!

            Krista ruala thi a, ama ruala phûma kan awm a, ama rual vêka tho leh kan nih si chuan, kan taksa lo ti bawlhhlawh țhîn tute zawng zawng lakah pawh, inti fihlîm tawh tûr kan lo ni!

   Paula chuan,

            "In taksa pêngte pawh fel lohna hriâmhrei atan sualna hnênah pe phal hek suh u." a ti a. (Rom 6:13 en rawh). Chuti a nih chuan, Tholeh Krista Thawhlehna țâwmpuitu chuan zu, drugs, methamphimine, ganja, marijuana, meizial, sahdah, tuibur, intûr  leh eitûr țhalo pui pui hmangin a taksa a tih bawlhhlawh a thiang tawh lovang.

            Petera phei chuan a la hâm strict lehzuâl a, kan chêtzia zawng zawng nên lam kan thianghlim tûr a ni, min ti: A kotu che u a thianghlim angin, nangni pawh in chêtzia zawng zawngah lo thianghlim zâwk rawh u; "Nangni in thianghlim tûr a ni, kei ka thianghlim si a," tih ziak a nih kha.(1 Petera 1:16).

            Chhiartu duhtak, tûn Easter Sunday ah hian, Krista ruala tholeh taksa thianghlim nêna thova, i taksa pêngte pawh fel lohna hriâmhrei atan sual hnênah pe phal tawh lo tûr leh, i chêtzia zawng zawngah pawh tholeh taksa thianghlimna chu ti bawrhbang tawh lo tûra thuthlûkna siam tûrin ka sâwm a che.

  "Nangni in thianghlim tûr a ni, kei ka thianghlim si a," Lal Isuan min ti a ni.