Article - AN VA HRELO ÊM!

AN VA HRELO ÊM!

            Tûnlai hian Gujarat sorkarin chappal Isua lem chuang, kehnuaia Isua rahbehna leh hmuhsitna entîrna atana an siam, a thlâwna an sem thu, a thlalak nên WhatsApp group hrang hrangah a darh nasa hlê mai a. Ka rilrua a thawh ve dan ka rawn Share ve lawk ang e:

            UN Police ah kum 2006 khan Africa khawmualpui, Sudan ramah ka zuk awm vêng vâwng tawh a. UN Member ramte kan kim țhîn khawp mai a. Ka lo la hriat ve ngai loh chu: Mosolman ram (Islamic Countries)  rêng rêngte hian Israel an huatna entîrnan an Passport phêk tinah "He can visit any country except Israel" (Israel tih loh chu khawi ram pawh a tlawh thei ang), tih hi a in chhu ngei ngei a lo ni a.

            An fing lo hi ka ti khawp a. Israel dah zero (khawvelah a awm ve lo tih) an tum luâtah Israel ram a awm thu an recognise na chu khawvel hriatah, an passport phêk tinah an puang tihna a ni zâwk reng si a!

            Gujarat sorkar pawh hian a lo ti tak tak a nih chuan Lal Isua, tumah do ve ngai lova chu an dona lamah chintâwk nei lovin an dova; anmahni chu mi fing lo tak an nih an puangzar ve mai chauh a ni.

            Bawngina lo piang a, ran chaw pêkna thlênga zal a, a zirtîrte ke sil saka, hmuhsitna tinrêng tuara leiah leh vanah pawh awm tlâk lova lei silo van silova Krosa thi Lal Isua tan hian chappal a thlalâk chuang, tih mai mai chu a na tham dâwn hian ka ring lo! Isua hi a awm ngei a ni tih an recognise thiam ve dan a ni mai!

            Hetiang chappal hi siam belh țeuh țeuh sela, Gujarat chhungkaw tinah, an inchhung room tinah Lal Isua lem hi bun lût rawh se; chutichuan mi tam thei ang berin Isu Masih hi tunge a nih tehrêng, tia an lo ngaihven theihnan he chappal hi Lalpan hmang hlauh rawh​ se