Article - SANGHA MANTU ATA MIHRING MANTU

SANGHA MANTU ATA MIHRING MANTU

            Tin, Galili dîl kama a len pahin, unau pahnih, Petera tia koh Simona leh a unau Andria chu dîlah chuan lên dêngin a hmu a, sangha mantu an ni rêng a.*Tin, ani chuan an hnenah, "Mi zui rawh u; tichuan *mihring mantu ah ka siam ang che u," a ti a.

(Matt. 4: 18-20)

            Sangha chu tui chhunga chêng an ni a. Duhtâwkin an hleuh a, an han leu zar zar te hi hmuhnawm tiin kan thlîr fo țhîn a, kan nguinate pawh min chhâwk zângkhâi țhîn a ni. An nun a zalên a, nuam pawh an ti a ni. Chutia hlim taka tuia an chêng chu lên hmangin an zuk man ta țhîn a. Sangha man tawhte chu khawmuala chêng țhang an nih loh avangin reitak an nung thei lova an thi vat țhin a ni. Sangha chu thi tûra man an ni a; Petera leh Andria pawh hian sangha an man țhîn a, an sangha mante chu an thi țhîn!

            Chutia Galili dîl kama lên an den lai chuan Lal Isuan a rawn hmu ta a, nung tûra mihring mantu atan a sâwm ta a ni! 

            Thi tûrin sangha an lo man țhîn a; tûn achinah chuan nung tûrin mihring an man thung tawh dâwn a ni!

            Khawvêl mihringte hi sualah kan tlu vek tawh a, Pathian nên kan lo in mihrang ta a, chatuana boral mai tûr kan lo ni a; chuvangin Pathian lakah mitthi kan ni ta a! Simon Petera leh a unaupa Andria te hi an hnathawh a letling thawk dâwn ta a. Pathian mithmuha thi tawh mihringte chu Chatuana nung tûrin an man ve thung tawh dâwn a ni!

            Simon Petera leh a unau Andria ang hian keini pawh he khawvêl tuifinriat zau taka boral  mêk mihring chhiarsên lohte hi nung tûra man tûrin Lal Isuan min duh a ni.

 "I âwm nghênga min pawm loh chuan, Min liampui dâwn sual tuipui in!"