Article - "KA NGHAWNGKAWL BÂT ULA, KA HNÊNAH ZIR RAWH U."

"KA NGHAWNGKAWL BÂT ULA, KA HNÊNAH ZIR RAWH U."

  "Ka nghâwngkawl bât ula, ka hnênah zir rawh u; thuhnuairawlh

   leh rilrua inngaitlâwm tak ka nih hi; tichuan, in thlarau tan chawlhna    in hmu ang." (Matt. 11:29)

            Lei lehna hmunah chuan, bâwng pahnihin nghâwngkawl inbahțawmin lei lehna hmanrua chu an hnûk dûn țhîn a. Bâwng pahnihte chu a ruala an kal dun zêl a ngai a; engti kawng mahin an in kalsan thei lo ani. Leilet sîra hnimhring îtawm tak takte pawh chu pakhatin amah chauh chuan a pet bîk thei lova, amah chauhin a bawk bîk thei lova, a hahchâwl bîk thei hek lo.

            Lal Isua chuan amah nên nghâwngkawl bât dûn tûrin, nghâwngkawl bah dun pui atan min sawm ani!

            Chutichuan, bâwng chhawr fin tawh, thi khawp hiala leilet neitupa thu lo zâwm tawha chuan min kalpui dâwn ani.

            Khua lo chhiain, ruahpui vânâwn pawhin min nuai mahse, angkhat vekin min dôpui anga; khaw êng nuam lah kan dawng dûn bawk ang a. Tuarna ruâmah, hmun ralțîah, khawi hmunah pawh kan kal dun zêl tawh dawn avangin, in thlarau tan chawlhna in hmu ang, tiin min tiâm ani.

            Chhiartu duhtak, "Ka nghâwngkawl a nuam a, ka phur pawh a zâng e," tiin Lal Isuan a sawm a che. 

   Khawiah pawh hlauhna rêng,

   Ka hre ngai lo vang.

   Isua nên chuan him takin

   Ka kal thei ang.