Article - Palm Sunday Pual- JERUSALEMA LAL PAHNIH LÛT TE CHU

Palm Sunday Pual- JERUSALEMA LAL PAHNIH LÛT TE CHU

            Kalhlen Kût a lo thleng mêk a, ni hnih chiahin a dâidang ta! Judai leh Samari ram leh a chhehvêla Juda mi awm tawh phawt chu Jerusalem khawpuiah an pungkhâm ruih ruih a, kumtinin mi 40,000 ațanga 200,000 an pungkhâwm țhîn a. An thlahtute Pharaoa bawiha an awm laia Israel faten an kawngka bianga berâm thisen an tah avânga Pathianin a tihhlum loh bîk hriatrengna Kût a ni a; Pharaoa bâwih nihna ata Pathianin a chhanchhuak tawh a, tûnah erawh chuan Rom sorkar hnuai ata chhanchhuaktu an ngai ngawih ngawih a, hel pawh an hel zeuh zeuh tawh țhîn a ni. Chu chu hre rengin, Kalhlen Kût hunah hian Rom sorkar pawhin Juda hovin buaina an chawh chhuah lohnan tiin, Security (vênhimna) uluk lehzual țhîn a ni. A hma daih tawhin Rom sorkar laka hel hrât khawkheng Barabba leh midangte phei chu an lo man tawh a, tâninah an tang mêk a; Krawsa tihhlum tûrin an chungthu rêl thlûk a ni diam tawh nghe nghe a ni.

            Lal Isua leh a zirtîrte chu, sabengtung no hawh chawpin, Kalhlen Kût hmang tûrin Jerusalem khawpuiah chuan an lût ve mêk bawk a. Lal Isua thinlunga lian ber chu a hun a lo thleng tawh tih hriâtna hi a ni a:

            Tûn hi Jerusalem a luh hnuhnûn ber țum a ni tawh dâwn a; tûn kar tâwp maia Jerusalem a chhuahsan leh hunah chuan tihhlum tûrin, Kalvari lam panin a chhuahsan tawh dâwn tih a inhria a; a zirtîrte chuan an hriat loh avangin,

            "Ni hnih achinah Kalhlen Kût a lo awm dâwn tih in hria a, Mihring Fapa hi khenbeh tûrin an mantîr dâwn a ni,"  (Matt. 26:2) tiin a hrilh nghê nghê a ni. 

            Rom sorkar thuneihna lak ata chhanchhuaktu thlahlel êm êm tu Juda ho chuan, Sabengtung chunga a chuang an hmuh chuan, Lal angin an lo lâwm a, an beisei ang lal erawh a ni hauh lo mai le!

   "Davida fapa hnênah Hosanna!

  Lalpa hminga lo kal chu fakin  awm rawh se

  Chungnung berah khian

            Hosanna!" (Matt. 21: 9). tia au tute vêk hian kar tâwp lamah chuan, "Kraws-ah khenbehtîr rawh," tiin nasa takin an la au khum leh dâwn a ni! (Matt.27:23(b).

            Chutia sabengtung no chung chuanga Jerusalema a luh mêk lai chuan, kulh kawngka lehlam, Khawthlang lam gate ațang chuan ram rorêltu Governor Pontia Pilata pawh chu Jerusalemah a lût mêk bawk a ni! Juda hovin Kalhlen Kût hman paha Rom sorkar phiârru zâwnga buaina an chawh chhuah lohnan sipai rual tamtakin an ralthuâm famkim inbelin an zui lût duah duah mai a!

            A hmuhnawm hian ka ring țhîn a ni; lehlamah Remna Lal chu sabengtung no chungah, remna entîrna tumkau hnah nên a lo lût mêk a. Khawthlang lam ațang ve thung chuan, Dan keng kawhtu chu sakawr chungah, fei leh ngunhnam kengin, ropui râpthlâk takin a lo lût mêk bawk a!

            Lal pahnihten Jerusalem an chhuahsan dan ve thung chu hetiang hi a ni: Bible chuan, Lal Isua chu Pontia Pilata court ah thiamloh changin, Krawsa khenbeh tûra tih a ni ta a. A ai ah sorkar huât ber mai, misual Barabba chu Kût lawmnan an chhuah zalên ta a. Kan lalpa chu Kraws puin, nasa taka sawisak chungin, thi ngei ngei tûrin Kalvari tlang lam panin Jerusalem a chhuahsan ta a. 

            Pontia Pilata erawh chu, ziaktu tam zâwkte sawi danin, AD 34 ah hêkna nasa tak avangin Rome ah koh lêt a ni a. Ziaktu tam zâwk chuan amah a intihlum ta niin an sawi.

            Kumin Palm Sunday hi i tan Palm Sunday danglam tak lo ni se a va duhawm dâwn êm! I thinlung Jerusalemah chuan Lal Isua hi Remna Lal ni tûrin lo lût sela, Cham hlen tûrin; Sual leh bawlhhlawhna, khâkna tinrêng avang chuan Kalvari lam panin chhuah tîr tawh lul suh ang che. Amen!