Sunday pual - I INNGEIH DIÂL DIÂL ANG U

I INNGEIH DIÂL DIÂL ANG U

            Nula pakhat hi bus ah a chuang a. Station pakhatah chuan nutling pakhat, midangte vêngthawng fahran lo hi a lo chuangkai ve a. Nula bulah chuan leng leh leng lovin a rawn innhawh lui châwt châwt a, a bag leh thil dang tamtak a khai bâwr bawk si; a hnawk nuaih mai a, a bengchhengin a phunchiar êm êm lehnghal a. An piah lawka țhu mi pakhat chuan a ngai thei ta lova. Nula hnênah chuan, 

  "Engtin nge i ngawih reng theih?

   Eng emaw sawi ve ta che!" 

Nui sang chung chuan, chu nula chuan heti hian a chhang a:

            "Inhauh buai a țul love. Kan zin dûn rei dawn lo. Kan hma lawkah sawn Station a awm a, chutah chuan ka chhuk tawh mai dawn e."

            Mihringte hi inhaw buai hman kan awm lo; kan zinho chhung hi a rei mawlh si lova; îtsîknate, khâknate, inngeihlohnate hi kan zinkawng ti hrehawmtu an ni a, kâr lovah kan zinkawng a tâwp dawn a ni, tih hi i hre nawn fo ang u. Kan țhenawm khawveng ah, chhungkua ah, hnathawhna hmunah te midang mitmei vên nachang hria ila, ngawih chuh thiam bawk ila; hlimtlang takin kan awm thei dawn a ni. Kan Pathian thu chuan, In nunna chu chhûm reilotê lo lang a, ral leh ang hi a ni, tiin min hrilh a ni (Jakoba 4:14). Chuvangin, i inngeih diâl diâl ang u.