"Eloi, eloi, lama sabakthani?"

"Eloi, eloi, lama sabakthani?"

            Kraws lêra a awm laia Lal Isuan Pa Pathian a auhna țawngkam khi a va danglam ta ve?! Tûn hma zawng zawngin, "Ka Pa," tiin a ko țhîn a; Pa chungchang a sawi rêng rêng pawh khan, "Ka Pa vân ami duhzâwng..," ti tein a sawi țhîn kha a ni a. Gethsemane huana an man hma lawk thleng pawh khan, "Aw ka Pa, a theih chuan he no hian mi pêl lul rawh se," a la ti zêl a (Matthaia 26:39).

   Tlangnêl taka "Ka Pa" ti țhîn khan, "Ka Pathian" a ti ta daih mai!

   An va in mihrang ta ve! An va inhlat ta êm êm ve?!

 "Ka Pathian, ka Pathian, engah nge mi kalsan?" (Matthaia 26:46b).

            Nangmah leh keima sual zawng zawng chu amah Isua khan a phur mêk a, sualin a bâwm khat tlat tawh a; sual chuan Pa leh Fapa chu a ti mihrang ta hlauh a ni, tih hi kan hmu thiam em aw? Sual bawlhhlawh leh Pa, thianghlimnaa khat chu an inthuhmun thei tawh tlat lo a ni!

            Chutiang bawk chuan, ni leh thla leh arsite pawh an biru zo vek a; khawvêl a lo thim ta mup mai a nih kha! Anmahni siamtu ngei mai chu, sualin a sawisa mêk a ni a, an lainat lutuk chuan an thlîr ngam ta lo a ni! Leilung meuh pawh a khûr a, lîr a nghîng  a ni! Chutiang kâr ațang chuan, Fapa nihna dinhmun kha Isua khan a beisei phâk rêng rêng lo; Pathian chu a Pathianna ațang chauhin a han dâwr thei hrâm a ni!

            Pain khawvêla a tirh chhan ber a thawh zawh chinah erawh chuan, "A kin ta" (ka thawk zo ta) a ti a, a thi a; phûma awmin, thihna hneha a thawh leh meuh chuan, Pa leh Fapa inlaichînna duhawm tak kha suih zawmin alo awm leh ta a: Chu Lal Isua thihna leh thawhlehna țâwmpuitu kan nihna azarah chuan, nang leh kei pawhin, "Ka Pathian," tia mihrang bîaka be tawh lovin, Fa kan nih ve tâk avangin, Ephesi 4: 6 -7 ah chuan, "Pathianin a fapa Thlarau chu, "Abba! (Ka pa!)" tia auvin kan thinlungah a rawn tîr a. Chutichuan, bawih i ni tawh lo va, fa i ni zâwk e," min lo ti ve ta a ni!

 

              Ka Pa, ka lâwm e!