Article : Pathian leh mihring - REMNA THUTHLUNG

Pathian leh mihring - REMNA THUTHLUNG

            India Sorkar leh Pakistan Sorkar chuan July 2, 1971 khan remna thu an thlung a. Ramri in zah tawn sak tûr leh Line of Control pêl lo tûrin. Chu chu Simla (Shimla) Agreement a ni a, Remna thuthlung a ni. Mahse, Line of Control chuan bawhchhiât a hlawh nasa hlê mai a, chu vang chuan vawiin ni thlengin J&K ah chuan ram pahnihte hi an inbei mêk zêl a nih hi! Thuthlung bawhchhiâtna chuan Indona a thlen țhîn!

            Mizo National Front chuan  India ram ațanga indan duhin independence a sual a. Kum 20 zet Mizoram chu a buai ta a. India Sorkar chuan zalenna ni lovin  State nihna chu pêk a remti ta a. MNF pawh chuan India Dânpui rorêlna hnuaia awm chu a lo remti ve ta bawk a. Chutichuan, lehlam lehlama thu delhkilh neiin, June 30, 1986 ah Peace Accord - Remna thuthlung an sign dûn ta a. An thu delhkilh, (Condition) ah chuan, MNF rammu te chu an râlthuam zawng zawng nên an rawn chhuak ang a, India Sorkar chuan State puitlinga hlangkaiin, State dangte hamțhatna dawn ang zawng zawng pêk a tiam a ni. Thil dang tamtak kan sawi vek kher lo ang a. Hei pawh hi Remna thuthlung a ni.

            Pathian chuan Israel hnamte nên Remna thuthlung a siam a.

            "Chuvangin, ka thu in awihtak zeta, ka thuthlung hi in pawm chuan, khawvêl hnam zawng zawng zîngah hian ka tan ro thlan bîk in ni ang; khawvêl pum pui hi ka ta a ni si a" tiin. (Exodus 19:5).

            Thu delhkilh chu, "Ka thu te in awihtak zeta, ka thuthlung hi in pawm chuan," tih hi a ni. A thu awihna leh thuthlung pawmna avanga pêk a tiam chu, "Khawvêl hnam zawng zawng zînga ro thlan bîk nihna" a nih chu. Israel hnam te tan chauh he thuthlung hi a siam a ni a, Thuthlung Hlui (Genesis ațanga Mika inkar zawng hi).

            Ka sawi tum ber chu hei hi a ni: Remna thuthlung rêng rêng ah lehlam ve vêin tih hlawhtlin tûr, zawm ngei ngei tûr an nei, tih hi.

            Israel hnamte nên chauh ni tawh lovin, Khawvêl nên thu a thlung țha leh ta a. Ran thisen leh inthâwina mai mai ahte Pathian lung a awi zo tawh lova, Lal Isua thisen ngei hmangin, Khawvêl (mihring zawng zawng tihna) nên Thu a thlung thar ta a. Matthaia ațanga Thupuan inkar zawngah  hian chu Thuthlung Thar chu kan nei ta a, Israel hnam zînga tel ve lote pawh min huam vek a ni. Kan hriat tûr chu, Thuthlung hlui hi a thar hlimthla a ni a, Pathian leh mihring inkara Remna Thuthlung lo la awm tûr sawina tho kha a ni. Chu thu chu, Jeremia 50:5 ah hian kan hmu a:

            "Hawh u, chatuan thuthlung theihnghilh tawh loh tûrah chuan LALPA chu rawn vuan rawh u khai."  a ti a ni.

            Vawi tamtak hâlral thil hlan a, ran thisen hmanga in tih thianghlimna chu a lo hlui ta a, Lal Isua thisen hmang chuan, tih nawn fo ngai tawh lo tûr Remna thuthlung thar kan lo sign ta a ni: 

            "Chumi duh zâwng chuan, Isua Krista taksa vawi khata hlan nghâl vâng khân tih thianghlimin kan awm ta." (Hebrai 10:10).

            Chhiartu duhtak, fîmkhur hlê rawh; Pathian leh mihring inkara Remna thuthlung lo awm ta pawh hian Thu delhkilh a nei a nia aw! I Bible ah khan chung Thu delhkilh (Conditions) te chu a chuang vek a ni. Thuthlung bawhchhiatna chuan Indona a thlen țhîn!

  Pathian nên inremin lo awm țhîn ang che!