Article - NU TE HNÊNA THURÂWN

NU TE HNÊNA THURÂWN

            Luka 7:11 ațanga 17 kan chhiar chuan, Hmeithai fapa kaihthawh thu kan hmu a. Lal Isua leh a zirtîrte chu Nain khuaah an lût dâwn a, mipui tam takin an zui bawk a. Kulh kawngkhâr kiang a thlen chuan, mitthi an rawn zâwn chhuak a. An khuate, a vui tu te, tamtakin an zui bawk a. 

            Keini pawhin kan tih țhin ang bawkin, thlanmual pana ruang zâwntute leh a zuitute zingah khan a hunlaia Kohhran hruaitu Pharisai te, Senhadrin hotute, khawtlang hruaitute, țhenrual țhate, nula leh tlangvalte pawh an awm nuk ang a. Amah Isua zuitu te nên phei chuan mipui tamtak an ni ve ngei ang.

            Mak deuh mai chu, heng mite hian Lalpa hnuk an ti ulh hranpa lova, a thinlung an hneh lêm lova, anni chu a kal pêl ve satliah mai mai niin a lang. Mahse mitthi NU in țap chunga a fapa ruang zâwntute a zui lai a va hmuh chuan, a kal pêl thei ta tlat lo mai! Tin, Lalpa chuan hmeithai chu a hmuh veleh, a khawngaih êm êm a, "Țap suh," a ti a. Tin, a va hnaih a, hlâng chu a khawih a; tichuan, a zâwntute chu an ding ta a. Tin, "Rawlthar, Tho rawh, ka ti a che," a ti a. Tin, mitthi chu a țhu chhuak a, a lo țawng ta a. Tin, Isua chuan a nu hnênah a pe ta a. (Luka 7: 13-15). NU chuan Lalpa lainat a hlawh bîk a ni tih kan hmu a ni!

            Lalpa mit hmuha NU in lo pawimawh zia leh Vohbîk in nih zia hi Bible ah hian hmun dang tam takah kan hmu a. Pakhat chauh rawn tarlang leh ila, 1 Petera 3:7 ah chuan, heti hian a ti: "Chutiang bawkin nangni pasalte u, in nupuite  nên in khawsak dânah bêl keh awl zâwk an nih hre thiam ula,  khawngaih thilpêk nunna chanpuitu che u an nih hriain chawimawi rawh u, tichuan in țawngțainate dâl a ni dâwn lo nia." A awmzia ni ta chu, paho pawhin lo hria se, mahni nupui duat nachang hrelo țawngțaina chu a thlâwn mai a ni tihna a ni! Chuti khawp chuan NU hi Lalpan a ngai pawimawh a lo ni! Kohhran Hmeichhe pawl in ni emaw, chhungkaw nu ber in ni emaw, Lalpa thinlung hneh theihna neitu chu NU in ni e.

            Chuvangin, nu zawng zawng te u, in fate tan, in pasalte tan, in chhungkaw tan nasa takin țawngțai țhîn rawh u. In lama țang Lalpa a ni e.