Article - "SETAN VANGA KA RÛMNA HI"

"SETAN VANGA KA RÛMNA HI"

  

Tuna a awm ang hi chuan thih ngei ngeina lam chu panin a bâi thleng mêk a. A kête chu lehlam lehlamin vein kalsual  leh pan hnaiin a ti vung cher chur tawh a. A thisen zamvêlahte chuan drugs tur chuan a fan chhuak vek tawh a. Nakin lawkah chuan hrehawm namênlo tuar chungin thihna kut vâwt chuan a la hmet hlum dawn ani tih pawh a inhria a, mahse a taksaa țhîngtu nasa taka rawn thawk leh țhîn chuan a tih chhunzawm loh chuan țah leh ha țhialna hmun, an tih țhin tluk zeta hrehawm hmangin a rawn tur sek țhîn bawk si; Damlai thlân thim chu! 

            Miten hmuhsitna mitmei nêna an mitsîr țhinna te pawh a hmuh țhelh ani bîk lo. Duh rêng vangin mi puanpho a seng ru leh țhîn pawh a ni vek bîk lo; a țhîngtu hi a chak lutuk a, mamawhna a sang a; a hrehawmna chhawk zângkhai tûr chuan chhînsen khat chauh tal a mamawh a ni, thlan tuiin a rawn buâl țan leh mêk tawh si a!

            Hman zan mai khan a nu pawh hi mittui sur zawih zawih chungin inah a lo leng tawh nghe nghe a. A nu chu hmeithai ani a, a fapa neihchhun a ni. A farnu pahnihte chuan pasal neiin hmun dangah an lâwi san tawh a. "Ka Pu, ruihtheih thila nasa taka lo tlan tawh i ni tih mite sawi ka hria a, zah pawh dawn lovin ka rawn pan che a ni. Ka fapa hi a thih ka la phal lo. I damna ang kha ka fapa tan hian ka duh ve ani!" Nutling, kanu rual zetin inhnît feih feih chunga a manganna ka bula a leihbua chu ngaihthlak pawh a nuam hauh lo mai. An television phei chu vawi tam tak a lei nawn tawh niâwm tak ani; a fapa neihchhun chuan duh hun hunah a puchhuak a, a dahkhamna zatin a nu hian a va khûl leh țhîn a!

            Mak tak maiin ka rilruah helai hlachang hi alo lang a, ka sa nghe nghe a-

   "Setan vanga ka rûmna hi,

    Min hmangaihtu ka hrilh ang a"

            Sualna zawng zawng neitu Setana vanga he mite nufa rûmna zozai hi, "min hmangaihtu" hrilh ve hun hi an va nghakhlel dâwn êm! Kei hmêlhriat pawh nilo bulah mah a sawi zo seng lo ani si a!

            Kei, Doctor hna nikhat pawh zir lo, Medical College varenda takngial pawh la dai lo chuan han tih vak ngaihna ka hre rêng rêng lova. Mahse, kan manganna leh kan lungngaihna zawng zawng min tih damsak theitu awmchhun, hmêlhriat țha deuh mai ka neih chu ka hre reng mai a. Isua ani.

            "Ka Pi, hawh teh. Tihdam theihna rêng rêng ka nei lova. Mahse keimah pawh min lo tidam tawh tu hnenah ka hruai ang che aw," ka ti a,  Lalpa hmaah ka kûnpui ta a ni.

  "Ka rettheihna ka ngai lawng;

   I buatsaih ram ka thlen hun chuan.

   Damchhung buaina ka pêl tawh ang,

   Lungngaihna zawng hnutiang chhawnin.

   Setan vanga ka rûmna hi, Min hmangaihtu ka hrilh ang a."