Article - ȚAHNA RUÂM KA ZAWH HI

ȚAHNA RUÂM KA ZAWH HI

  "Țahna ruam ka zawh hi

    Ka Lalpa zawh hnu lamtluang a ni.

    Mittui nen ka zinkawng Zawh mah ila,

    Ka Lalpa hmel duhawm, Hliam hnu kha

    Hmu in hlimin hla mawi Kan rem tawh ang!"

            Nitin mahni Kraws pua  zui hi thil namai lo tak a ni! Kraws chu misual nung tlâklo te tih hlumna atana Rom sorkarin a hman țhin kha a ni a. Chuvangin heng hrehawm zawng zawng, tih duhdahna, endawng, hmuhsitna, thihna, chân vekna te a keng tel tlat a.  

            Ka ngaihtuah fova, kan Lal Isuan Kalvari tlang a put thlen ațang tawh khân, khawvêla amah zuitu Christiante hian englai pawhin, khawi ramah emaw tal tih duhdahna, hmuhsitna, a hlâwm hlâwma suatna kan tâwk reng mai chu a nih hi! A nuaih têlin kum zabi tinah martar an awm ruih ruih mai a. Lal Isua pian zanah Heroda ațanga ințanin, Rom Sorkar leh Sorkar chak tak tak lo awm zêlte nen khaihlak hauh lovin Iron Curtain, Islamic Radicals...  India ram ngeiah pawh Hindutva țantu pawlte an lo ni leh zêl a.  Kraws put chu khawvêl laka danglam ngamna anih vângin, khawvêl hian a 'ei' thei thlâwt lova. Chu chuan tih duhdahna tinrêng a hlawh chhuak a; thihna thlengin. Chu chu kan Kraws put a ni.Vâna kan lawmman hmuh tûr chu hrehawm tinrêng tuar chhuak a kan hlawh tûr a ni, tih Bible in min hrilh a:

             “Tin, upa zînga pakhat chuan ka hnênah, “Hêng puan vâr sinte hi tute nge ni a, khawi aṭanga lo kal nge an nih?” tiin mi bia a.Tin, kei chuan a hnênah, “Ka pu, nangman i hria alâwm,” ka ti a.Tin, anin ka hnênah, “Hêng hi hrehawm nasa tak ata chhuak hote kha an ni a, an puante Berâmno thisena suin an tivâr ta a.” (Thupuan 7:13-14)

             Kan Kraws put hian hrehawm tinrêng keng tel mahse, min lo hmuaktu lawmman ropui tûr zia hre rengin, i thlah phal hauh lovang u.

            Lal Isua hminga i tawrhnate kha i tlin dâwn ngang lova i hriat rum rum chang te pawh a awm fovang. Chutih hun ahte chuan, Do tute tana Lallukhum a tiam kha lo hrenawn leh țhin ang che.