Article - THLARAU HMÊLȚHA

THLARAU HMÊLȚHA

            “Tin, Lalpa Pathianin leia vaivutin mihring a siam a, a hnârah chuan nunna thaw chu a thaw lût a; tichuan, mihring chu mi nung a lo ni ta a.” (Genesis 2:7)

            “Vaivut chu a awm angin leiah a chang leh a, Thlarau chu a petu Pathian hnênah a kîr leh a ni.” (Thuhriltu 12:7)

            Kîr leh tur kan ni tih kan hriat nawn fo hi ava țûl em ! I hmêl țha tak, i taksa ruangam pian nalh bîk tak, i duhawmna zawng zawng te kha vaivuta kîr leh mai tûr an ni a. Chutiang bawkin, i hmêl mite aia chhe bîk tak mai, rual ban lohna nei, taksa famkimlo pawh kha vaivutah tho a kîr leh dâwn! Lal Solomona'n, "Engmah lo mai an ni," a tihte kha an ni a.

            Chatuana nung reng, Pathian laka mi, nunna thaw (thlarau) kawltute kan ni a; hei hi ani vaivuta chang ve lo tûr chu! He lei taksa vaivuta siam hi vaivut vêka a kîr leh hunah pawha ral ve lo tûra chu a ni a. Chhungril lama hrisêlna, chhungril lama mawina, chhungril lama duhawmna zâwk kha Pathian hnên min thlentu tûr zâwk chu a ni tih hre thar leh ang u.

            Kan lei taksa thihna hmang chauhin siamtu Pathian kan hmu dawn a. Lei taksa thihna paltlang lovin thlarau ram kan thleng thei si lo. Chumi hunah chuan kan thlarau chu a petu Pathian hnênah a kîr leh dawn a, chu Thlarau chu nangmah diktak zâwk chu a ni si a. 

            I lei taksa chuan rual a ban emaw ban lo emaw, a hmêl a chhia emaw a țha emaw pawh ni se, reilotê atan chauh a ni. Zawhna pawimawh zâwk lo nita chu hei hi a ni: I chhungril nun hmêl, 

          I thlarau hmêl a țha em?"