Article - Sunday pual- "THLÂN HIAN A FAK THEI SI LO CHE A"

Sunday pual- "THLÂN HIAN A FAK THEI SI LO CHE A"

             “Thlân hian a fak thei si lo che a; thihna hian a chawimawi thei hek lo che;   Khuarkhuruma chhukte chuan i thutak chu an beisei thei lo a ni. 

Mi nungin, mi nungin, anni ngei chuan, vawiina ka tih ang hian an fak ang che;

Pa chuan fate hnênah i thutak chu a hriattîr ang. Lalpa chu mi chhandam tûrin a inpeih reng a ni; Chuvângin, kan dam chhûng zawng zawngin, Lalpa inah chuan Ka hlate hi ṭingṭangte nên kan sa ang.” (Isaia 38:18-20)  

            Lal Hezekia damlo, a dam leh hnua a thusawi hi a pawimawh hle mai ! Thi mai tûra awm tawh chu, Pathian khawngaihna nasa tak avanga tih dama a awm leh khân, he khawvelah hian mi nung (nung dama awmte) chauhvin Pathian an fak thei tih hriain he thu hi a sawi chhuak a ni a. Chu chu kei pawh ka dinhmun chiah a ni a. Thin (liver) chhe vek tawh, Doctorte pawhin tih ngaihna an hriât tawh meuh loh kha  ka ni a. Ka thin chu an thlâk hlawhtlin hlauh chuan ka dam leh maithei, dam chuang lo maithei; thlâk loh erawh chuan nung chunga Aizawl pawh ka thlen lêt zawh an beisei tawh loh hnu,  50-50 chance dinhmuna awm; "tih pawhin thi tho mai thei - tih loh chuan thi dâwn chiang" dinhmuna awm chu a hrehawm zia sawi thiam pawh a har ka ti! Tichuan, ka fanu chu zai hawngin a thin min phel ta a. Kan pafa chu hlâng chungah kan awm rân mai a. Thin hi an thlâk ngai a ni tih phei chu Mizoten kan la hriât lêm loh hunlai kha a la ni a; kan hriât chhun chu "Bethlehem veng ah sawn pa pakhat chu a thin an thlâk tawh a, cheng nuaih 80 vêl an seng a, mahse a thi ta thova," tih kha a ni mai a! Huphurh awm rem rem tak a ni! Kan nupaa damdawiin khuma inhmâichhana kan in țah khum râwih râwih lai te kha aw!

            Nasa taka min lo țawngțai saktu te chuan che lo thei lovin Pathian an lo kar mawlh mawlh avanga dam khawchhuak leh kan ni tih hi vawi tamtak pawh piang nawn leh dawn ila theihnghilh chi a ni hauh lo mai!

            Chhiartute zîngah hian Lal Hezekia leh keimah ang bawka thihna kotlanga awm rên râwn tawh, chumi ațanga Lalpan a tih dam lehna changtu in awm ve ngei ang a. Hawh u, keini vawina mi nung  ni a, Pathianin damna leh hrisêlna a pêk leh tâkte hian Lalpa fak leh chawimawi hi kan tih tûr a ni tih i hre thar leh ang u. 

            Pathian fak tur hian he khawvelah hian tumah dam hlen kan awm dawn si lova, "khuarkhuruma chhukte chuan i thutak chu an beisei thei lo a ni." Kan damchhung ngei hian fak chintâwk nei lovin i fak zêl ang u.

  Hringnun par vul lai a tâwi mang e,

  Dam chhung kum hi thawnthu angin a tâwp țhin..

  A reina chu Thawhrimna,

  Lungngaihna, Hreawmna mai,

  Kan damchhung nite chhiâr dan  min hrilh rawh.

    "Mi nungin, mi nungin, anni ngei chuan, vawina ka tih ang hian an fak ang che"