Article - A LAIAH ISUA

A LAIAH ISUA

            Kalvari tlang chu Juda mipuite chuan râlkhat ațangin an thlîr țhup mai a. Kraws pathum an hmu a. Chung Kraws ahte chuan misuala an puh, thi tûra an chung thu an rêl tawhte chuan an hnuk chah hun nghâkin thu hnuhnung an sawi bawrh bawrh a.

            Veilam sira an khenbeha chuan Isua chu a chhâl pûng pûng mai a; Ding lama awm erawh chuan chu pa chu a rawn khak lêt mawlh mawlh bawk a! Hetah hian mihringte hi thih dâwn darkar thleng pawha inngeih loh ching kan ni a, thinlung huatnaa khat kan ni, tih a lang a ni. Chu Scene ah chuan, Isua chu a awm a, misual leh misual inkarah a ban a phar a ni!   

Rev. H.P. Runremthang chuan ,

   "Van leh khawvêl leh a chhungah

     Remna leng se tiin,

    A laiah Isua a lo ding ta,"

tiin hlathu mawi takin a rawn puang chhuak a; Van leh khawvêl inremna atana a ban phar tu Isua, lei chhunga awm mihring leh mihringte inkara remna atana a ban phar tu Isua hi a laiah kan dah zêl theih a țûl hian ka hre țhîn. Chutichuan, Politics khawvêlah, Kohhranah, Chhungkua leh Khawtlangah inngeih lohna a rawn irhchhuah dawn apiang pawhin, kan mi huatte leh keimahni inkarah, a laiah, Isua dah zêl ila kan lo inrem zêl mai dawn a lo ni!

             

          Calcutta kawtthlêra fahrahte a lâkkhawm chiam chiam țum khan Mother Teressa kha miin an zawt a,

  "Hetiang naupang berh leh bâl lutuk te hi engtin nge i hmangaih theih?" tiin.

    Mother Teressa chuan, "An hmêl ah Isua ka hmu," a ti!

  

 Mother Teressa chuan amah leh Fahrahte inkarah Isua a dah tlat a; a piaha mite a thlîr apiangin Isua a hmu tel lo thei lo zâwk a ni!

            A lai takah Isua dah zêl thiam ila, remna leh hmangaihna ban a phar zêl dawn a lo ni!

   "Kraws lêrah misualte karah

    I ban i phar ang khan,

    A laiah Isu, lo ding leh rawh."