Article - "THÂMRAL LEH MAI TÛR HIANIN MAW..."

"THÂMRAL LEH MAI TÛR HIANIN MAW..."

            Tûkin chu he lêngzêm hla hi ka rilruah a cham tlat mai a, ka rilrua thil awm ka rawn share lawk ang e:

  "Aw, engan nge maw 

  Khuanu hian,

  Hringnun hi alo duan le?

  Thâmral leh mai tûr hianin maw!

  Duh vâng rêngin kan piang si lo."

   

 "Chuti ngawt chu ani thei dawn em ni?" ka ti a. Kan lo piang a, dan pangngaiin kan lo  seilian a, kan lo tar a. Chu chu, chhûm anga thâmral leh ringawt tûrin maw? Chumi piah lamah chuan ka nun hian awmzia a nei tûr ani ngei ang, tih tein ka ngaihtuah reuh reuh a. Leitlangpui lah chu chhûmin a bâwm chûk mai si a!

            Engtik ni ah emaw chuan ka la thi ve ngei dâwn a. Ka chênna in chu "mitthi in" an lo ti anga; ka nupui fanaute chu "khawhar chhungte" tih an lo ni ang a; Vuitu in ka piangthar emaw thar lo emaw, chhungte rilru dam nan tal - min 'chham kai' hrâm a tum anga. Ka chanchin, a țha zâwnga sawi tûr awmchhun ve tê tê an sawi liâm liâm anga. Ka thawnthu chu a lo tâwp tawh ang! Heti ringawt chu a ni thei lovang, a ho êmai; thâmral leh mai tûra duan han nih ngawt mai chuh!

            Kan samzai zât nên lam maia min hre fai vek tu chuan, awmze neia nung tûrin, Ama tan leh kan mihring puite tana kan theihna zawng zawng hmanga hnuhma țha leh hriâtreng tlâk tam thei ang ber hnutchhiah tûr atan min siam ani ngei ang. Thil țha tia siâmin, Ama kutchhuak kan ni si a

            Kan inpui bera han haw hma hian, țhatnain rawng inbâwl tawn sak ila, thil țha tih i ning lovang u.