Article - TÛKINA KA INKHÂWM CHHAN CHU

TÛKINA KA INKHÂWM CHHAN CHU

            Tûkin chu chawhma inkhawm ka țhulh mai dawn em ni, tiin ka inkhap nasa khawp a. Boxing hmuhnawm ti mi ka ni a; Boxing ka en chuan inkhâwm ka tlai dawn a, an fei phian phei chuan inkhawm chu ka țhulh maithei bawk a.

            Money Mayweather leh Mc. Gregor inhnek tûr chu TV ah live a en châkna hmang chuan Setana chuan ka sihhnipna lai takah mi rawn sik leh ta pek a!

            Ka hmaah duhthlan tûr a awm ta:

 TISA DUHNA leh THLARAU DUHNA!

            Heti hian ka ngaihtuah ta a: Money Mayweather chu lo chak leh ta pawh ni se, a Money nawi khat pawh ka kutah a rawn thleng dawn lova; vawitekhat mah min la țanpui ngai bawk lova. Ka biak ka Pathian erawh chu, a lakah rulh sênloh leiba ka nei, tih leh amah chawimawi tûr ka ni, tih ka hrechhuak a. Pathian duhzawng a nih ang ngeiin, a Biâkbûk lam chu ka pan ta a ni. Ka inkhawm lo thei lo ani! Ka bûklung hmante hi han chhiar ve mah teh: i TISA DUHNA aiin i THLARAU DUHNA in a bûk rit zâwk ve ngei ang -

1. Ka nunna hi Lalpa fak tûr ani a; Ka kawchhûnga awm zawng zawngte pawh hi A hming thianghlim fak tûr an lo ni a.

 2. Ka nunna hi Lalpa fak tûr ani a, A thiltih ṭhat zawng zawng chu theihnghilh rêng rêng lo tûra hriattir ka ni a,

3.  Ani chuan ka khawlohna zawng zawng a ngaidam ṭhîn a; ka natna zawng zawng a tidam tawh ṭhîn a; a la tidam zêl dawn bawk si a.

4.  Boralna lak ata ka nun chu a tlan ṭhîn a; Ngilneihna leh lainatnate min khumtîr ṭhîn a.

5. Ka kâ chu thil ṭhain a titlai ṭhîn a; Chutichuan, ka tleirâwlna chu mupui anga siam tharin a awm leh ṭhîn.

6.  Ka sualnate angin ka chungah a ti lo va, Kan khawlohnate angin min thungrûl hek lo.

7. Vân khi lei chung sâng taka a awm angin, Amah ka țih phawt chuan ka chunga a ngilneihna chu a nasa dâwn a ni. tih ka hria a (Sam 103:1-5, 10-11).

 Chuvangin, ka inkhawm ta zawk ani.