Article - VIRGIL-A THLARAU

VIRGIL-A THLARAU:

(Adapted from Virgil's Spirit by Rev. Oswald J. Smith)

   

Virgil-a chu a natna khumah chuan thihna nên an inbei mêk a. A chau hlê tawh a, a hun a thleng ta, tih a hria a. A rilru ngaihtuahna pawh a fîm meuh tawh lova. A bula awm ve, amah bawihsâwm tute leh a chhungte țawng ri a hriatte pawh hla deuh ațanga inbia ang maiin a hria a. An thâwm a hriatte chu a hla tial tial a, a khawhmuh pawh a fiahlo tial tial bawk a. Ama sawi dânin,

            "Thâwklehkhatah ka taksa pawnah chuan ka lo țhu hlawl mai a. Mahse, ka bul amite chuan min hmu rêng rêng lo! Ka taksa, ngawi renga mu hlê hlê chu an khawih a, ațhen chu an țap țan a; a țhen chu an tîtî mawlh mawlh bawk a; maktak maiin kei chu min hmulo!

 

Mak ti êm êmin ka hawikual a; ceiling lam ka hawi chho chiah chu, awi karei!!!

"Mihring pawh an ni chiah lo, mi pathum râpawm êm êm mai ka han hmu a; ka hmulthi a ding sung sung a, ka tiril a khûr nasa! An mitte chu meiling sen vût ai mahin a sen zâwk a; bâk thla ang mai hi an zâp hluau hluau vek a; an taksa chu sangha ang maiin phuhlip in a khat! Bawng mei ang, a hmâwr erawh fei kibâr ang mai, sei deuh an nei țheuh bawk a. Sîr lehlam lehlam ațangin pahnih chuan min rawn pan hnai ta tial tial a. A lai ami chuan khaidiat hrawl deuh mai hi a hnûk a. Min rawn zîm țan alo ni, tih ka hriat chuan ka au vak vak a, mahse ka bula awmve te chuan an hre theilo. A țhen an țap a, ațhen chu an titi mawlh mawlh bawk a. Ka awm ve tih pawh an hrelo! Ka tlânchhe ta a.  Ka țang lutuk chu thui deuh deuh ka zuang a, nakin lawkah chuan ka thlâwk thei tih ka inhre lehzêl a. Ka la zei lo lutuk.  Mak ka ti hlê nghe nghe a!

 

"Min rawn pantu pahnihte chuan room chhungah chuan min ûm kual ta zak zak a. Ka thlâwh kual chiam chiam lai chuan, bang chu ka su palh a; mak tak maiin, engmah lo ang maiin bang lehlamah chuan ka tlang daih a! Pawn boruakah leh leiah kan in ûm zêl a, ka zângkhai huih bawk a, ka tlânchhiatna dâl theitu niawm te chu ka su tlang zêl, awmlo ang mai an ni!

 

"Min ûm hrep hnuah chuan min man bet ta nge nge a; an khaidiat lian deuh mai chuan min phuar a, chak lutukin chhuk zawngin, lei hnuai lamah min pil thlâk pui ta vawn vawn mai a. Aimit thlawn ang maiin a thim mup a, boruak lum chu a sa tual tual a. Mihring authâwm nasa tak ka hre phâk ta a. Mangang authâwm ani! Tuihâl authâwm ani. Hrehawm tinrêng tuarte authâwm ani. Thisen ti khang thei khawpa authâwm râpthlâk vek mai chu a thanghkâwk ring tual tual a. Ka tâl theilo, khaidiat rit tak mai chuan min thunun hneh lutuk a; auchhuâk tûr pawhin ka aw a pawp theilo!

 

"Mak deuh maiin, chûng authâwm chu an lo reh leh tial tial a, boruak sa hut hut pawh a zia ve zêl a; ka rilru alo harh a, ka mit ka han meng chu ka chhungte leh țhianțha ten ka natna khumah chuan min lo kîl laih hlawm a. Ka tâl nasa ani ang, mak ti êm êmin minlo en hlawm a. Ka lo nung leh alo ni a. Chatuan hremhmun thleng lovin ka lo kîr leh alo ni reng mai!!!"

 

            Virgil-a chuan a natna khum ațang chuan Piangthar lova thih chu a Râpthlâk zia a hmu chiang kher mai! Chanchin Țha Johana ziak 3:16 hi pianthar nan a hmang ta a.

  

Chumi hnu lawk chuan Virgil-a chu a thi ta thova; zawitêa "Tu pawh a ring apiang an boral lohva, chatuana nunna an neih zâwk nan.. Lalpa, ka ring e!" ti chungin thlamuang takin a châwl ta ani.

Article- NGAIHDAMNA FAMKIM

NGAIHDAMNA FAMKIM

  

Țumkhat chu ka țhiannu Maêngi (a phalna la-a ziak ka ni e) hi a tlân a. A țhian ka nihna ațangin, Maêngi pasal chhungte chuan ko tûrin min tir a. "In inkawmngeih a, i thu chu a hnial kan ring lo, i ko haw thei ber ang," tiin.

  

Ka va thlen chuan, Maengi leh an venga a țhiannu pakhat hi an lo awm a, eng dang sawi set set lovin, "Ka rawn ko dawn che. Ka rualin lo phei nghâl rawh, ka hmanhmawh ania," ka ti nghâl bawrh bawrh a. Maêngi min chhânna chuan thil dang daih min ngaihtuah tîr a, ka kal chhan ber theihnghilh țhakin Pathian thu kan han sawi leh hrih a!

  

Thinrim êm êm hian, "Vawi thum ka ngaidam tawh....." tiin a âng nasa mai a. A țhiannu lah chuan alo amen pui țha khawp mai. "U Zova hi chu a lêrh lutuk, World Bank Road ah pawh...." alo ti ve mawlh mawlh a.

    "An sualna leh âtna te chu,

    Ka hre reng tawp lovang;

    An tan Ka Fapa a thi si

    Lal Pathianin a ti"

  

  

He hlachang hi ka rilruah alo lang nghâl a. Dawngi chuan a pasal kha Vawi Thum a ngaidam tawh tih a chhinchhiah thlap! Ngaihdamna famkim ani em, a zât nên lama hre zui reng tûra ngaihdamna hi?

  Pathian erawh chuan, "Ka hre reng tawh lovang" a ti!

            "Dawngs, nangni țhian pahnih țhudûn leh Pathian leh Isua țhudûn in inan lohna ka hria: Nang i âng char char a, Zova sualnate i sawi fai vek a. Țhiani lah hian alo hêk belh mawlh mawlh a; Anni pafa ah erawh chuan, Pa hnênah Rûm chhiarsên lohvin ngaihdam  min lo dîlpui mawlh mawlh tih Bible in min hrilh a!"

  

            Ani, mihring ngaidamna chu a tluantling lova, a famkim thei lo.

            Simna thinlung diktak pua Lalpa hnên rawn pan tute erawh chu, Pathianin an hun kal tawha an sualte theihnghilhin,  ngaihdamna famkim a lo pe țhîn ani!

  Ka sualna zawng zawngte hi,

 Mite'n hrereng țhîn mahse;

 Lalpa, nang erawh chuanin,

 I theihnghilh si..

Article - " KA AWM ANGIN KA LO KAL ANG "

" KA AWM ANGIN KA LO KAL ANG "

  "Ka awm angin ka lo kal ang,

   I thisen hlu ka tân a luang;

   Tin, Nangin min sâwm avângin,

   Ka Tlantu, ka lo kal.

 

Hla phuah thiam Charlotte Elliott kha kum 46 mi anihin pa pakhatin Kristian anih leh nih loh a zâwt a. Mumal taka chhân ngaihna a hriât loh tâkah chuan, a kalsan ta mai a. Mahse, chu pa zawhna chuan Charlotte-i rilru a luah ta tlat mai, chu pa chu ava pan leh ngat a. Ani chuan, "I awm ang ang khan lo kal mai rawh" (Come just as you are), tiin alo chhang awlsam êt a. Chu thu tâwitê chu Charlotte-i tan chuan ava thui si êm! A awm ang angin Lal Isua hmênah a in hlân ta a, hê a testimony hla hi a phuah ta ani!

  

Țhalai duhtak, nang pawhin "I awm angin" Lal Isua i pan dâwn em le?

   I hun kal tawhah, mi nupui/pasal i uirê sak tawh em, nau i ti tlain tual thattu inih i inhre ru khiau em, suamhmang i lo ni tawh țhîn em, i dinhmun sang tak ațang khan i hnuaia mite chanvo i eirûk sak țhîn em, sual zêprûk nangmah chauhin i hriat - nangmah ti nuamlo fo țhîntu i nei em? Nge, tûnah pawh khan drugs addict emaw zu ngawl vei mêk i ni em? Kan Pathian thu chuan,

 “Lalpa, nangin khawlohna  te i chhinchhiah chuan,

Aw Lalpa, tu nge ding ang le?

Nimahsela, i hnênah ngaihdamna a awm a ni...”  tiin Sam 130:3 ah chuan min hrilh a. Amah Lal Isua țawngkam ngei, "Tupawh ka hnêna lo kal chu ka hnar tawp lovang," tih hi nangmah leh keima tân ani asin! A ropui ani!

  

Kan sualte chhinchhiah lova, ngaidam țhîn tu Lal Isua chuan, "Ka hnar tawp lovang" ati a che. In buatsaih chiâm a ngai lo.  

   Tûnah, i awm angin  Lal Isua pan rawh le!

  "Misual thitûr an khenbeh khân,

  Faina lui chu a hmu;

  Amah tlukin sual mah ila,

  Min tihthianghlim theih chu!"

   Lalpan malsâwm che rawh se.

Article - JOSEPHA KHA

JOSEPHA KHA

  Jakoban a enin - Fapa duatlai a hmu a.

A unauten an enin - Mumang neia an hmu a.

Median sumdawngten an enin - Tlangval hralh tla tak nitur an hmu a.

Tang vengtuin a enin - Hebrai saltang a hmu a.

Potiphara nupuiin a enin - Sex symbol a hmu a.

Mahse, nakin lawka Aigupta ram Lalber Dawttu ni mai tûr a nihna kha an hmuh hmaih ani !

 

Kan awmna hmun leh kan awmdan azirin mite min hmuhdan a danglam thei viau țhîn âwm e. Kan awmdan leh kan awmna hmunte thlan thiam a lo pawimawh hle mai!

"Kei hi khawvêlin engtin chiah nge min hmuh ve țhin le ?"

LEI TAKSA BORAL TURAH HIAN ISUA HMEL DUHAWM LANG ZÊL SE....