Article - KHAWVÊL HLIMNATEN MIN AU MAHSE

KHAWVÊL HLIMNATEN MIN AU MAHSE

  

Zankhat chu Aizawl dai, Picnic Spot țha deuh mai ah hian Party naah ka mikhualte an sâwm avangin ka va kal ve a. Delhi lam vai an nih vangin an tlangnêl loh ka hlauhpui vang ani ber a. Chumi hmuna keima taksa chhunglam leh pawnlama  indona chu ka rawn share zuai ang e:

  

Thimhlim dar 7 thlenkim hun an tih aia tlai hret ah ka mikhualte nên chuan kan va thleng ve a. An lo start tawh a. Green room hranpa awm lovin whiskey, brandy, wine, beer leh coke te chu a duh apiang tan zalên takin an lo serve mêk tawh a. Tualzâwl chu Dance Floor ah hmangin, ngaihthlâk nuam tâwk a rimawi remin thenkhat chu kawppui nei leh nei lo tein an lo lam tui viau tawh a. Ka țhiante pawh chuan mahni brand ve ve an dawm a, midang kârah chuan an inzep ve mai bawk a; kei chu driver ho awmna- motor parking bulah chuan ka phei ta hrih a. Min hria an awm tâkin, tiin a thim lamah langsâr lo tûrin ka țhu a. Car pakhat chhûngah chuan 'tlai mah vâr ila kan in ning chuang lawng e' ti niawm fahran a midang mitmei veng lêmlo te pawh ka va hmuthei a. Hetiang nikhua a nuam ti pâwl kha ka lo ni ve țhîn a. Daw miah lovin, hemi chinah ringawt pawh hian nuam ka ti, lung hlui a thar hle ani! Chutih nâk alai chuan, nakin lawkah chuan chhas chhe lêmlo tak, min hre tu, ka hriatchhuah ve theih mai loh hian min rawn bêlbul a. A kai deuh tawh niin ka hria. Min biakna te chu mawihnai takin ka chhâng zêl a...  a kawr hma (clevage) chu melh zauh zauh a awl kher mai, a tilui țhîn bawk si ! Mipa ve tho ta na chu... mahse, pâ lo min ti ngawt ang!

 

Pathian aw, fîmkhur tûra min hrilhru a awm țhîn, mi piangthar tawh ah chuan. Chu Pathian thlarau aw, cautioning  chu kan hai der țhin vang ani, țhalai tamtak kan tlûk leh țhin ni. A vawi khatna, vawi hnihna, chutiang zêlin...  chu  'aw' chu a zawi ve tial tial a, nun kalsan tawhah kan kîr leh țhin! In thiamlohna kan neihte pawh a reh ve tial tial thei zuk ni a!

 

Hemi zan pawh hian, tûn  țum chauh chu.., rui tham lovin.., a perfume...., hnutê chin chauh..., hmêlhriât loh kâr ani tho a.., kan nuin a hre dawn chuanglo.... Setana aw hre hrang thei khawpin rinna ah ka lo puitling hman hlauh a, "Lalpa ka ui viau nain ka lawm e!" Fuihna 'aw' pahnih ah chuan, Pathian lam chu ka thlang ta ani. Setana mualpho nan leh Lalpa ropui nan ni rawh se.

 

  Khawvêl hlimna ten min au mahse,

  Hnuchhawn ram ka ngai tawh lawng;

  Khawvêl ni kin ni pawh lo  thleng mahse,

  Ka nung reng ang, Krista ah chuan.