Article - ISRAEL SAL HMEICHHE NAUPANG

ISRAEL SAL HMEICHHE NAUPANG

            Sipai hotu chaktak leh ropui tak, Naamana chanchin hi chuan sawi a hlawh viau țhîn a. Sermon tamtak kan ngaithla tawh țheuh âwm e.   

 

Amah kan belhchiân ve țhin ngai lêmloh, a nupui rawngbâwl sak țhîntu - a sal kawl lai hmeichhe naupang ropui zia leh a hnên ațanga zirtûr kan ngah zia hi kan ngaihtuah țhîn em aw?

 

Naamana alo phâr a, a mangang takzet tih Bible ah kan hmu a. Tah chuan sal hmeichhe naupang chuan a pi Naamana nupui hnênah, "Ka pu hi Samari khuaah zawlnei hmaah va kal sela ka va ti êm ve aw! A phâr hi alo tidam mai tûr a." ati a (2 Lalte 5:3).

Tichuan kal tûrin Naamana chuan Lal phalna ava dîl ta a. Suria Lal chuan Naamana hnênah, "Va kal tak rawh khai, Israel Lal hnênah lehkha ka thawn ang e." alo ti mai nia! (chang 5na).

 Heti chinah ngawt pawh hian he sal hmeichhe naupang hi ropui ka va ti êm!

 

1.         A nu leh pa lak ata la hrang a, lunglêng êm êm leh fahrah a siamtu, a damchhung atan sal ni tûra man tu, Naamana lakah huatna, khâkna, rilru chhia  rêng rêng a pu lo! A rilru thianghlim zia hi!!

 

2.         An chhungkaw hlimna zawng zawng țahna a chantîrtu, a hmangaih ber berte hmu tawh rêng rêng lo tûra țhendarhtu Naamana chuan damna a hmuh theihnan a țanpui tlat!

 

3.         Suria Lal leh Israel Lal chu  an indo mêk lai ani tih kan hria a. Chutih hunlaia lehlam sipai hotu lawk tak mai, hmêlma rama Zawlnei hmu tûra kal chu thil âtthlâk tak ani! Mahse, Suria Lal leh Naamana thinlung a hneh tlat! Sal tân na ramah pawh he Israel sal naupang tê hi a Pathianin a awmpui tih kan hmu thei âwm e! Zawlnei Elisa a rawn hre vang vang!!

 

4.         Indona nasa tak kârah inkahhai (cease fire) a puântîr! Suria Lal leh Israel  Lal chu nasa takin an indo mêk a. Chuti chung chuan, Lalin a hmêlma Lal hnênah lehkha a thawn! Chu mai chu ani hleinêm! A sipai hotu Naamana chu a tîr a, hmelma Lal pawh chuan engtia alo tihnat kan hre lo ! Mak tak ani!!

 

5.         Heti taka naupang tê ni chung pawha, a rûk têa ropui êm êm hi a hming pawh a lang lo nia! Bible chuan, "Israel ram ațangin hmeichhe naupang tê hi salah an rawn hawn a" ati ringawt! (chang 2na).

  

Ka ngaihtuah a: Kohhranah, khawltangah, thil tihhona ah, țhenkhat chu kan hming a lansarh loh chuan, kan phûr lo fo! He sal naupang, a hming pawh sawi rîk loh tê hi ava entawn tlâk êm!!