Article - CHRISTIAN KA NI E

CHRISTIAN KA NI E

            Sir Ganga Ram Hospital, Delhi ah ka thin an paih vek a, ka fanu thin chu an phel a, min pe țhen kha ani a. A hunlai khan Mizoten thin thlâk kha kan la hmêlhriat lêmlo. A hlauhawm, kan râp ani! Ka fanu min hmangaihna khan Pathian leh keini inkara hmangaihna awm dan min hriat fiah tîr khawp mai. Chu chu remchang danga sawi atan dah ila.

  

An doctorte inpêna a sangin a ropui lutuk! Mahni tâwka Specialist țhê țhâw an ni a, an in ngaitlawmin an hnaah an in pumpêk a. Dr. Naimish Mehta, Dr. Piyush Ranjan, Dr. Shailendra, Dr. Vivek Mangla, Dr. Siddarth te an ni. Tu emaw ber kha chuan englai pawhin min vil tawp mai a. Ka rilruah an thil țha tihte, patient an hmangaihna (ka ti mai) te, an felna zawng zawngte kha Lal Isua hminga ti ni sela chuan, Vanram chang tlâk ngawih ngawih an ni, mahse thil țha tih vang ngawtin chhandamna a awm si lo.

 

Keini ve lêm chu, kan eizawnna hna ngawih ngawih pawh thawk țha pwihlo te, kawng chi hrang hranga sual ve tak takte kan ni a, mahse thisen kan rinna chuan min chhandam hlauh lawi si a, tihte ka rilruah a lian țhîn khawp mai.

  

Namên lova min țawngțai saktuten Pathian pawh che lo thei lovin an siam a. Damlo dangte aiin, mak an tih khawpin, kan pafa chu kan țha chak a. "Mr. Kima, what are you?" (Pu Kima, eng nge i nih?) min ti fo mai a. "Police ka ni e" ka tih loh leh, "Tunah chuan Senior Staff Officer, Mizoram Home Guards ka ni e" ka tih pawhin an zawhna ngai bawk chu min zâwt leh țhîn ...

"Mr. Kima, eng nge i nih?"

"Christian ka ni e" Ka ti ta phawng mai a.

 

Mak tak maiin, chuta chin chu ka nihna min zawt tawh ngai lo! Ka damna thurûk chu Lal Isua zâwk ani tih an hrethiam ve ta ani ang e! Dam ver vawr ni ila, Isua chanchin hrilh mawlh mawlh ka va châk êm! An țhatnate kha Isua hmingia tih ni se, an tan chatuan nunna kawng awm chu an hlat lo ka ti! Kolossa 3:24 thu, "In tih apiang chu mihring țan anga ti lovin, Lalpa țan anga ti zawkin, châk takin ti rawh u; Lalpa Krista rawng in bawl a nih hi," tih kha ka ngaihtuahna ah alo lang fo rêng a.

 

Kan mihring puite chungah thil țha i ti zêl ang u, Christian kan ni e, Amen.