Article - ZU IN SIM RAWH

ZU IN SIM RAWH

 

"Tin, ani chuan, 'Ka pa  Abraham, ni lo ve, mitthi zinga mi meuh an hnênah kal zâwk sela an sim ang," a ti a. Tin, ani chuan a hnênah, 'Mosia leh zâwlneite thu an ngaih loh chuan mitthi zinga mi tho leh mah sela an awih chuang lovang,' a ti a," a ti a.   (Luka 16: 30-31)

  

Zu in mite pualin hei hi ka sawi duh: Zu hian țhatna rêng rêng a nei lova. Mihring taksa tichhe tu, pachhiatna thlentu, nunna suat tu ani, tih hi. Zu (ethanol) hian fatty liver (thinlian), mît liam (jaundice), thin ro (cirrhosis), abrassion (pilh/lawng), ulcer (pumpui pan) a siam a; kal (kidney), lung (heart), ril bâwm (pancreas), tha zam (nerve), thin (liver) a khawih chhia a. T.B, Zun thlum, BP sang, Pneumonia, a awmtir a. Zu vanga thin țhalo benvawn (CLD/ALD) a awm tawh chuan, kîr leh ngaihna a awm tawh lo..tamtak chu Banding an tihin an ngaih a țha ringawt a. Banding hi a damna ani ber lo. Internal bleeding vênna mai ani; transplant hial a țul tawh țhîn a, sawi aiin a râpthlâk. Mahni nunna chân ngam khawpa hmangaihtu i neih a ngai a, chutah pawh tests 20 chuang ah 1 lek pawha in inmil loh chuan a theih loh. Laina thisen zawmpui ngei ani tih document felfai tak in neih loh chuan YMA thisen inpêk anga tih ve ngawt a theih loh. Heng zawng zawng piahah Chêng nuaih 25 ațanga nuaih 40 i neih a, a pawimawh berah i lamah Pathian a țan a ngai bawk!

 

Zu in nasa tih hriatna - tha khûr, mit eng pup, vun dum/thu, hriatrengna țhalo, uak, thin thîp, êk mumal lo/Zu santên - i neih tawh phei chuan, nghei mai a tâwk lovang. Doctor țanpuina i mamawh tawh hlê tihna ani. Tin, i hriat leh tur chu, zu in mi 80% hian inhre lovin WKS (Wernicle Korsakoff Syndrome) an vei. Chumi zinga 10% - 20% chuan an thihpui! Cerebellar Ataxia vangin, Visual and hearing delusions an nei a, Ramhuai an hmu duh a, an in rin tâwk loh fo avangin an dawheh a, Delusion of Grandeour an nei a - chhuântûr nei êm êm si lovin an chapo hle! Khing buai duh suh, an thi țêp tawh!

 

Thlalâk a lan ang hian, zu in ka sim duh lohna in a rah chhuah chu râpthlâk tak ani! Ka thin chu paih vek a ngai a; ka fanu pawi sawilo chu an zai hawng duaih mai a, a thin chu an phel a, min pe țhen ta a...

 

Ka fanu Lalrindiki @Mateii  chuan ka tan a nunna  a thâp mai ani lo. Min la fuih mawlh mawlh zawk. Amah pawh wheelchair a ala awm laiin, na ti chung chungin min rawn kan a:

 

"Pa, a nat chang pawhin ti hian ka ngaihtuah țhîn a:  Keini chu a nat zual changin Nurse kan kova, Betadine tein min dressing sak a, nachhâwkna tein min chiu mai a; Lal Isua erawh kha chu, kan tana Krawsa a awm lai khan, tumah dressing tih sak tu emaw nachhâwkna  petu a nei ve lo"...  atih chuan min vêl ani!

  He operation (surgery) chhung zawng hian kan pafa thin te chu chawhtawlh-ah te an dah a! Darkar tamtak chhung chu mitthi kan ni ber a...

Mitthi zing ami tho leh meuhin ka hrilh che hi - ZUIN SIM MAI RAWH.