Article - KHAWVÊL ÊNG IN NI E

KHAWVÊL ÊNG IN NI E

            Keia lungmâwl hian, Pathianin ni (sun) a siam hma khan leilung leh vân thengreng thleng pawh khian a thim mup vek tûrah ka lo ngai nghet tlat pek a..! Ni, thla leh arsi te khi êng kan hmuhna hnár ber emaw ka lo ti țhîn a. Mahse, chu chu thil awmdan alo ni hauh lo mai!

Genesis 1:16 kan chhiar chuan, "Tin, Pathianin êntu ropui zâwk chu chhûn rorel tûrin, êntu ropui lo zâwk chu zân rorel tûrin a siam a; arsi te pawh khi a siam bawk a," ati a, chang 19-na ah "Tichuan, tlai lam a awm a, zing lam a awm bawk a, a ni li na chu," a ti a.

 

Chuti chu, a ni li na ah chauh ni leh vânsang ațanga êng min petu ni, thla leh arsi te khi a siam anih si chuan, hêngte awm hma hian êng a awm tûr ani. A hmalam ni thum chhûng mai ni lovin, leilung rêng rêng a siam hma daih pawh khan êng chu a awm alo ni! Chu chu Pathian êng ani! Chu Pathian êng chu ni leh thla leh arsite ral hnuah pawh la êng tûra chu ani. Chu êng chu Mitdel John Milton pawhin, "Ni ai pawhin I êng zâwk (Thou art brighter than the sun) alo tih kha ani a, hla siamtu dang lehin, "Ni ai pawha êng zâwk chu, ka thinlungah a awm," a tih kha. Mithiam ten kan ni (sun) khian kum tam a daih tawh lovang, a rêm (burn out) mêk, an ti - a dik ang. Mahse, Ram ni tlâkna ngai loh, CHATUANA ÊNGAH CHUAN mi thianghlim ten an chhandamtu an fak dâwn a, chu êng chu ani, kan power supply bulpui ber zâwk chu!

 

Mihringte hi Pathian ah ni lovin, a anpuia siam kan ni a; Pathian kan nilo, kan ang, tihna. Amah ațanga chhuak, nunna thaw (breath of life) min pe a, kan nung. Chu nunna chu a lo chhuahna Pathian hnêna kîr leh tûr ani. Chutiang bawkin Pathian nêna nun inzawm tawhte chu, keimahniah Pathian êng chu a awm. Chuvangin, Mathaia 5:4 thu, "Khawvêl êng in ni e," tih hian Pathian nêna inzawmna nei ve duhlo, piangthar lo te a huam ve lo.   

 

Chhiartu duhtak, Pathianin he khawvêlah mai nilovin, ni leh thla leh arsi te êng a kin hnuah pawh Chatuana ama hnêna êng tûrin a duh che.