Article - NGAWIH RENG HI SUAL ANI

NGAWIH RENG HI SUAL ANI

 

Eden huan lai taka thei rah kha Pathianin ei a khap mai ani lova, "in ei tûr ani lo; tawh pawh in tawk tûr ani lo, chuti lo chuan in thi ang," a ti. (Gen. 3:3b) Bible hian a sawi chiah lo nain, Adama hnêna Pathian thupêk, Adaman a nupui Evi a hrilh chhâwn a nih a rinawm. A chhan chu, hmeichhe lu chu mipa ani tiin Bible vêkin a sawi a. Rûl hian verther takin a hmeichhe âwmnêm leh zuâmawm zâwk - Evi a pan mai zâwk anih hmêl.

 

Chutiang chu lo ni ta se, rulin Evi a thlêm mawlh mawlh lai khan, Adama kha hmun dang daih ah a kalbo tihna em ni ang? Anih hmêl loh. Evi bulah awm vein, a ngaithla ve reng a,  mahse, a ngawi reng! Chuvangin Eden bawhchhiatna hi mipa bawhchhiatna ani, hmeichhia an fihlim! (ti teh ang, nuho lâwmah)! Adama sualna ani - Ngawih rengna Sual!

 

Hemi thu hre reng chunga kan chhehvêla suahsualna leh kawhmawh bâwl te, diklo taka thil ti țhin te kan hrilh loh a kan pelh mai mai chuan, thiam kan chang bîkin a rinawm loh! Kristian chuan sual a do ngam tûr ani tlat a. Chutiang bawkin, Chhandamna Chanchin țha hre lova boral mai tûrte kan vei loh chuan, Missionary rilru kan put loh chuan - Lalpa hmaah insawi fiah kan hmabâk ngei dawn ani.

 

Ezekiela 33:8b ah chuan, "Mi suaksual chu a awm dân kalsan tûra i hrilh loh chuan, mi suaksual chu a khawlohna ah a thi ang a, a thisen phuba erawh chu i lakah ka la ang." tiin Bible in min hrilh ani.

 

Kristian, i chênna bul vêlah, i hnathawhna hmunah, i zin veivahna ah, mi suaksual chu a awm dân kalsan tûra i hrilh lo emaw, Chanchințha i ngawihbo pui anih chuan, Lalpa i hmachhawn hun tûr chu huphurhawm tak ani ngei ang; I lakah an thisen phuba  a la dâwn si a!